Եվրամիությունն ու ԱՄՆ-ն Ռուսաստանի հետ հարաբերությունների հարցում ընդհանուր դիրքորոշում չունեն: ՌԻԱ Նովոստիի փոխանցմամբ՝ Բրյուսելում ԱՄՆ նախագահ Դոնալդ Թրամփի հետ Եվրամիության կառույցների ղեկավարների հանդիպումից հետո այս մասին հայտարարել է ԵՄ Խորհրդի նախագահ Դոնալդ Տուսկը:
«Մենք ընդհանուր դիրքորոշում չունենք Ռուսաստանի հարցում: Չնայած ինչ վերաբերում է Ուկրաինայի հակամարտությանը, մենք, կարծես, նույն ուղով ենք ընթանում»,- բանակցություններից հետո լրագրողների հետ զրույցում ասել է Տուսկը:
Տուսկը նշել է, որ Թրամփին իր հիմնական մեսիջը եղել է այն, որ իրենց համագործակցության եւ բարեկամության համար «հատոկ նշանակություն ունեն արեւմտյան հիմնարար արժեքները, ինչպիսիք են խոսքի ազատությունը, մարդու իրավունքներն ու մարդու արժանապատվության հանդեպ հարգանքը»:
Նրա խոսքով՝ կարեւորն այդ արժեքների, այլ ոչ թե պարզապես շահերի շուրջ համախմբումն է: «Արժեքներն ու սկզբունքներն առաջին հերթին այն բաներն են, ինչի մասին պետք է խոսեն Եվրոպան եւ Ամերիկան»,- հավելել է նա: