«Ավրորա» նախաձեռնությունն ամբողջ աշխարհում հայկական ժառանգության եզակի օրինակ է. սա ոչ միայն մեծ առավելություն է, այլ նաեւ պատասխանատվություն: Մայիսի 25-ին այս մասին հայտարարել է «Ավրորա» հումանիտար նախաձեռնության եւ UWC Dilijan միջազգային դպրոցի համահիմնադիր Ռուբեն Վարդանյանը՝ ելույթ ունենալով «Ավրորա» մարդասիրության ցուցիչ նոր միջազգային հետազոտության արդյունքները ներկայացնելու ժամանակ:
Հետազոտության համաձայն՝ հումանիտար գործունեությունը անկման փուլում է, եւ փախստականների ճգնաժամի հաղթահարման հետ կապված միջազգային առաջնորդների գործադրած ջանքերի նկատմամբ մեծ վստահություն կա:
Հասարակական կարծիքի հետազոտությանը մասնակցել է 12 երկրներից 6500 մարդ: Հարցվածների ընդամենը 9 տոկոսն է հավատում, որ իրենց գործունեությունը կարող է փախստականների համաշխարհային ճգնաժամի լուծման հարցում փոփոխություններ կատարել: Արդեն երկրորդ տարին է՝ ահաբեկչությունը նշվում է որպես առաջնահերթ հումանիտար խնդիր. այս տարի նման կարծիք ունի հարցվածների 63 տոկոսը: Ահաբեկչությանը հետեւում են հարուստների եւ աղքատների միջեւ խորացող խզումը, սովը, կլիմայի փոփոխությունները եւ հարկադրված միգրացիան:
Վարդանյանի խոսքով՝ հումանիտար գործունեության նկատմամբ անտարբերությունը այսօր ավելի էական անհրաժեշտություն է դարձնում բոլոր ոլորտներում ներգրավվածությունը: «Այդուհանդերձ, չնայած մեծաթիվ խնդիրներին, ահաբեկչությանը, շարքային մարդիկ կարող են ինչ-որ բան անել, կարող են ինչ-որ բան փոխել: Մենք հավատում ենք, մենք լավատես ենք, մեր ապագան մեր ձեռքերում է: Մենք հույս ունենք, որ այս ինդեքսը կարեւոր գործիք կդառնա ամբողջ աշխարհում»,- ընդգծել է Ռուբեն Վարդանյանը՝ հավելելով, որ «Ավրորան» մեկ օրվա իրադարձություն չէ, սա միջոցառում է, որն անցկացվում է ամբողջ տարվա ընթացքում:
