20-ամյա բրիտանացի ուսանող Դեյմոն Սմիթը դատապարտվել է 15 տարվա ազատազրկման պայթուցիկ սարք պատրաստելու համար, որը նա իր հետ տարել էր լոնդոնյան մետրոպոլիտեն, հայտնում է BBC-ն։
2016-ի հոկտեմբերին նա լոնդոնյան մետրոպոլիտենի ճյուղերից մեկում թողել էր պայթուցիկ սարքով ուսապարկ։
Ուսանողն ինքն ասում է, որ չէր ծրագրում պայթյուն կազմակերպել մետրոյում։ Նա վստահեցնում էր, որ ընդամենն ուզում էր վախեցնել ուղեւորներին։
Սակայն քննիչները հայտնել էին, որ պայթուցիկ սարքը ունակ էր գործել North Greenwich կայանի հարթակում։
Քննության տվյալներով, Սմիթը, որը տառապում է աուտիզմով, պատրաստել էր պայթուցիկ սարք, հետեւելով համացանցում «Ալ Կաիդայի» հրապարակած հրահանգներին։
Սարքի պատրաստման համար ուսանողը օգտագործել էր սուպերմարկետից 2 ֆունտով գնված ժամացույց
Դատավորի խոսքով Սմիթի արարքի լրջությունը «չի կարող չափազանցվել»։
Սմիթի փաստաբանները դատավորին խնդրել են մեղմել պատիժը։ Նրանք ասում էին, որ իրենց պաշտպանյալը արդեն յուրացրել է դասը։
Սակայն դատավորը որոշել է չմեղմել դատավճիռը։ Ըստ դատավոր Ռիչարդ Մարկի՝ չնայած Սմիթը ահաբեկիչ չէ, հայտնի է, որ մինչեւ այդ միջադեպը նա զբաղվում էր պայթուցիկ սարքերի պատրաստումով։
