Արցախի Մարտունու շրջանի Խնուշինակ գյուղում այս տարի ավարտում է 5 աշակերտ՝ 2 աղջիկ եւ 3 տղա: Չնայած սրան՝ դպրոցի միջնակարգ դպրոցում այսօր գեղեցիկ միջոցառում է անցկացվել:

«Մի քանի օր առաջ մենք վերջին դաս արեցինք ու ավանդույթի համաձայն այցելեցինք Արցախյան մարտերում զոհված հերոսների  հուշարձան, ծաղիկներ դրեցինք, երեխաներն էլ ելույթ ունեցան հենց այնտեղ: Այսօր արդեն Վերջին զանգն էր, ամեն ինչ, ինչպես որ կարգն էր, արել ենք»,- NEWS.am-ի հետ զրույցում ասաց դասարանի դասղեկ Էլանորա Յախշիբեկյանը:

Դպրոցն ավարտած 5 աշակերտներից մեկն է շարունակելու ուսումը բարձրագույն ուսումնական հաստատությունում: Մանե Մովսիսյանը մտադիր է ընդունվել Արցախի պետական համալսարանի աշխարհագրության բաժինը:

«Մանեն մասնակցել է նաեւ աշխարհագրություն առարկայից օլիմպիադայի, շրջանային փուլում հաղթել է և հանրապետական փուլում երրորդ տեղ զբաղեցրել, որից հետո Երևան է եկել, մասնակցել հաջորդ փուլին և ունի մասնակցության վկայական: Նա պարգևատրվել է մեր վարչակազմի ղեկավարի կողմից, ԿԳ նախարարի կողմից դրամական պարգևով: Այնպես որ թեպետ գյուղը փոքր է, բայց այստեղ մեծանում է խելացի և բանիմաց երիտասարդություն՚»,- ասաց Էլանորա Յախշիբեկյանը;

Մանեն մեզ հետ զրույցում նշեց, որ հույս ունի՝ իր գիտելիքները հարազատ գյուղին պետք կգան:

«Ես չեմ ցանկանում գյուղից հեռանալ: Մենք պատերազմական վիճակում ենք գտնվում և թշնամին նենգ է, կարծում եմ՝ մեզ առաջին հերթին պետք  են գիտելիքներ, մենք պիտի լինենք խելացի և վստահ, այդ դեպքում կարող ենք միայն հաղթել»,- ասաց շրջանավարտը:

Նշենք, որ Խնուշինակ գյուղը Մարտունու շրջանի փոքր գյուղերից է, դպրոցն ունի շուրջ 95 աշակերտ,  բնակչությունը հիմնականում զբաղվում է գյուղատնտեսությամբ, այգեգործությամբ: