Հյուսիսային Կորեայի կենտրոնական հեռուստատեսությունը ցուցադրել է «ցամաք- օդ» նոր հրթիռների փորձարկումները։
Այդ հրթիռների նպատակն է ոչնչացնել հակառակորդի անօդաչուները կամ հրթիռները։ Փորձարկումներին ներկա է եղել երկրի առաջնորդ Կիմ Չեն Ընը, որը գոհ է մնացել իր տեսածից ու կարգադրել է սկսել զենքի նոր տեսակի սերիական արտադրությունը։
Տեսանյութում հրթիռի արձակումը ցուցադրված է տարբեր դիտանկյուններից։
«Կայծակի նման մեկ ակնթարթում փոշիացրեց հակառակորդի անօդաչու սարքն ու հրթիռը»,- կադրի ետեւում լսվում է մեկնաբանողի ձայնը։
Կիմ Չեն Ընը գովել է ռազմական ղեկավարությանը, նշելով, որ «անցած տարվա համեմատ բարելավվել են օբյեկտը հայտնաբերելու, հետապնդելու ու ոչնչացնելու ունակությունները, նաեւ նշանակետին հասնելու տոկոսը»։ Նա նաեւ ցուցումներ է տվել «առավելագույն քանակությամբ արտադրել նոր համակարգը», այնպես, որ «այն անտառի պես ծածկի ամբողջ երկիրը», որպեսզի «ոչնչացնի օդում գերազանցության մասին հակառակորդի պատրանքները»։
