Գյումրի քաղաքից մի խումբ մշակողներ ստեղծել են բնակելի տների ու շենքերի կառավարման համար ալգորիթմ։ Կանաչ տեխնոլոգիաների հայկական կենտրոնի (AGTC) համահիմնադիր ու տնօրեն Խաչիկ Սահակյանը NEWS.am -ի թղթակցին հայտնել է, որ մշակողները արդեն ավարտել են համակարգի համար ալգորիթմը ու ստեղծել են դրա նախատիպը։
Հեռահար հսկողության համակարգերը կենտրոնի հիմնադիրների համար մի քանի նախագծերից մեկն է։ Բայց նրանց համար ամենակարեւորը (դրանից էլ հենց անվանումն է ստեղծվել) Գյումրիում ու Շիրակի մարզում վերականգնվող էներգետիկայի դեմո- նախագծերն են։
«Իհարկե մենք կարող էինք մեր սոֆթը վաճառել նման համակարգեր արտադրողներից մեկին, բայց ուզում ենք էլեկտրոնիկան էլ ինքնուրույն արտադրել,կամ էլ գոնե հավաքել։ Թող Հայաստանում ավելի շատ արժեքավոր բաներ ստեղծվեն»,- ասել է նա։
Երկրում էլեկտրոնիկա գրեթե չի արտադրվում, դրա համար էլ դեռ վստահ չեն, թե դրա ինքնարժեքը որքանով մրցունակ կլինի։ Բայց ալգորիթմի մասին հստակ հայտարարում են, որ այն նույնիսկ չինական անալոգներից շատ ավելի էժան կլինի։
Նախագծի ֆինանսավորման համար կենտրոնը ստեղծել է հիմնադրամ։ «Բանկային վարկերը մեր ուժերից վեր են, բայց առեւտրային ձեռնարկություններին հրավիրում ենք փայատիրական մասնակցության»,- հայտնել է Սահակյանը։
Նախագիծը ներկայացվել է Կառավարությանը ու հավանություն է ստացել աջակցության համար։ «Հիմա մենք նրանց կողմից որեւէ գործողություն ենք ակնկալում։ Հնարավոր է ՝ նրանք ներդրումներ կանեն մեր հիմնադրամում»,- հավելել է Սահակյանը։
Կանաչ տեխնոլոգիաների հայկական կենտրոնը ստեղծվել է միջազգային դոնորների ՝ ՄԱԿ Զարգացման գործակալության (UNDP) ու ՀԲ-ի Գլոբալ էկոլոգիական հիմնադրամի (GEF), նաեւ ԵՄ-ի, Զարգացման ավստիական գործակալության ու ավստրիական Hilfswerk Osterreich բարեգործական կազմակերպության աջակցությամբ։