Արեւաշող խաղողի այգիներ, Արարատ սարի տպավորիչ գագաթներ ու հոյակապ ջրվեժներ՝ Հայաստանում բոլոր տեսարանները գեղեցիկ լուսանկարների գրավական են։ Այս մասին ասվում է Հայաստանին նվիրված հոդվածում, որը հրապարակվել է ԱՄԷ-ում տպագրվող Khaleej Times թերթում։

Բազմաշերտ պատմությունն ու վառ մշակույթը դեպի Հայաստան ուղեւորությունը դարձնում են շրջադարձային իրադարձություն յուրաքանչյուրի կյանքում։ Ալեքսանդր Մակեդոնացու արշավանքներից սկսած մինչեւ հռոմեական լեգիոնների, պարսիկների ու օսմանների հարձակումներ՝ քաջարի հայերը այս ամենի ականատեսն են դարձել։ «11-րդ դարում թաթար սելջուկների ներխուժման պատճառով իրենց հողերը կորցրած հայերը նոր թագավորություն են կառուցել Կիլիկիայում, որը բարգավաճել է մինչեւ 1375 թ․, խաղալով զգալի դեր խաչակրաց արշավանքներում։ 20-րդ դարում, խորհրդային իշխանության յոթ տասնամյակներից հետո՝ 1991-ին հանրապետությունը վերջապես անկախություն ձեռք բերեց»,- գրում է հեղինակը։

Հոդվածում նշվում է, որ Հայաստանը հոյակապ երկիր է զբոսաշրջիկների համար։ «Մայրաքաղաք Երեւանը գրավում է, քանի որ այնտեղ միաձուլվել են մոդեռնն ու միջնադարյանը, հինն ու ժամանակակիցը»,- ասվում է հոդվածում։

Հեղինակը Հայաստանի տեսարժան վայրերի գեղեցկությունը նկարագրում է որպես «թանգարան բաց երկնքի տակ», մասնավորապես առանձնացնելով Խոր Վիրապ եկեղեցին, Գառնի տաճարը ու Գեղարդ համալիրը ու նշելով, որ Հայաստանը եղել է Մետաքսի ճանապարհի ճանապարհի մի մասը, ինչի շնորհիվ հարստացել է երկրի մշակույթը։