Լոնդոնում մզկիթներից մեկի մերձակայքում բեռնատարը մխրճվել է մարդկանց բազմության մեջ, երբ մարդիկ հավաքվել են գիտակցությունը կորցրած տղամարդու շուրջ։ Այս մասին հաղորդում է Press Association գործակալությունը՝ վկայակոչելով ականատեսին։
«Ես քայլում էի փողոցով եւ տեսա գետնին պառկած մի տղամարդու։ Երբ մոտեցա նրան, ասացին, որ նա առողջ չէ. նա կորցրել էր գիտակցությունը»,-գործակալությանն ասել է Աբդիքադար Վարֆան։ Նրա խոսքով՝ քիչ անց, երբ ինքը հեռացել է դեպքի վայրից, բեռնատարը մեծ արագությամբ մխրճվել է մարդկանց բազմության մեջ։
Times պարբերականը, վկայակոչելով ականատես Աբդուլռահման Սալեհ Ալամուդիին, գրում է, որ վարորդը բղավում էր, թե «ցանկանում է սպանել բոլոր մահմեդականներին»։
Կիրակի լույս երկուշաբթի գիշերը Լոնդոնի հյուսիսում՝ մզկիթի մերձակայքում, բեռնատարը մխրճվել է երեկոյան աղոթքից վերադարձող մարդկանց բազմության մեջ։ Ոստիկանությունը տեղեկացրել է, որ միջադեպի հետեւանքով մեկ մարդ է զոհվել, 10 վիրավոր կա, որոնցից 8-ը հիվանդանոց են տեղափոխվել։ 48-ամյա տղամարդ է ձերբակալվել։