ՊԵԿ-ն ամեն օր պայքարում է արտոնյալների ու մենաշնորհների դեմ. ունենք արդյունքներ թե, ոչ, կարծում եմ բյուջեի առաջին 5 ամսվա թվերը փաստում են, որ դրական միտումներ կան: Այս մասին, այսօր՝ հունիսի 27-ին, ԱԺ-ում լրագրողների հետ զրույցում նշել է ՊԵԿ նախագահ Վարդան Հարությունյանը՝ պատասխանելով հարցին, թե իր պաշտոնավարման ընթացքում հաջողվե՞լ է խոշոր գործարարներին բերել հարկման դաշտ, պայքարել օլիգարխների դեմ, որ չլինեն արտոնյալներ ու մենաշնորհներ:
Անդրադառնալով ԱԺ պատգամավոր Միհրան Պողոսյանի ընտանիքին պատկանող «Քեթրին Գրուպ»-ում անցկացված ստուգումներին, ՊԵԿ նախագահն ասաց. «Քեթրին գրուպը» տնտեսվարող սուբյեկտ է, որտեղ կարող է առաջանալ ցանկացած խնդիր, ինչպես բոլոր տնտեսվարող սուբյեկտներում: Այս տեսանկյունից, եթե ունենք որոշակի ռիսկեր որեւէ ընկերությունում, բնական է, որ պետք է ստուգվեն»: Նա խոստացավ լրագրողներին ներկայացնել, թե էլ որ ընկերություններում է ՊԵԿ-ը ստուգումներ իրականացնում:
«Որեւէ երկրում ստվերը 100 տոկոսով վերացված չէ, ուղղակի մենք պետք է ամեն օր հետեւողական պայքար տանենք դրա դեմ: Եթե ձեզ հետաքրքրում է կոնկրետ «Ալեքս տեքստիլը» (պատկանում է ԱԺ պատգամավոր Սամվել Ալեքսանյանի ընտանիքին-խմբ), բոլորն ենք ստուգելու, մի ֆիքսվեք մի սուբյեկտի, մի ձեռնարկության վրա: Եթե խախտումներ բացահայտվեն, կլինեն նաեւ պատիժներ»,-ասաց Վարդան Հարությունյանը՝ կոչ անելով ցանկ տրամադրել ձեռնարկությունների, որոնց վերաբերյալ լրագրողներն ունեն կասկածներ:
Հարցին, թե եղե՞լ է դեպք, երբ որեւէ խոշոր հարկատու ստվերում է եղել եւ իրենց գործունեության արդյունքում նրան բերել են հարկման դաշտ, ՊԵկ նախագահը հրաժարվեց պատասխանել՝ նշելով. «Դուք իմ 8-9 ամսվա գործունեությունը տեսել եք, ես երբեւիցե չեմ փորձել մեր ձեռքբերումները հանրայնացնել եւ բարձրաձայնել, ուստի թույլ տվեք այդ հարցին չպատասխանել: Որովհետեւ հարկային գաղտնիք կա: Ցանկացած տնտեսվարող իր աշխատանքում կարող է թույլ տալ սխալներ, ստուգման ընթացքում այդ սխալներն ի հայտ են գալիս եւ շտկվում են, որի արդյունքում պետբյուջե տուգանքի տեսքով գումարներ են վճարվել: Եթե տուգանքը վճարվել է եւ շտկվել է, ինչո՞ւ եք ուզում հիմա ցեխ շպրտել այդ մարդկանց երեսին»:
