Հայաստանում Եվրամիության դեսպան Պյոտր Սվիտալսկիի հայտարարությունը մեծ աղմուկ է հարուցել, սակայն ցանկացած առողջ առաջարկ կարելի է քննարկել: Այս մասին հունիսի 29-ին հայտարարեց ԱԳ փոխնախարար Շավարշ Քոչարյանը` ելույթ ունենալով ԱԺ մշտական հանձնաժողովներում 2016 թվականի պետական բյուջեի կատարողականի հաշվետվության քննարկման ժամանակ:
Օրերս Հայաստանում ԵՄ դեսպան Պյոտր Սվիտալսկին հայտարարել էր ապրիլին կայացած խորհրդարանական ընտրությունների ընթացքում գրանցված թերությունների եւ ընտրական համակարգում բարեփոխումների անհրաժեշտության մասին:
«Այս ոլորտում մենք արդեն բարեփոխումներ կատարել ենք, սակայն դա չի նշանակում, որ այսուհետեւ ամեն ինչ լավ է: Ցանկացած առաջարկ, որը մեր շահերից է բխում, պետք է քննարկել»,- ասաց Քոչարյանը: Միեւնույն ժամանակ հավելեց, թե դժվար է պատկերացնել` ԿԸՀ-ում քաղաքացիական հասարակության ներկայացուցիչներին նշանակելու մասին դեսպանի առաջարկի կատարումը: «Քաղաքացիական հատվածը պետք է, սակայն վերահսկողության, այլ ոչ թե կառավարման համար»,- նշեց փոխնախարարը:
