Ընթացիկ տարվա մայիսին մայրաքաղաքի բնակարանային շուկայում ռեկորդ է սահմանվել. տարեկան կտրվածքով առքուվաճառքի գործարքների թիվը շուրջ մեկուկես անգամ՝ 46.5%-ով ավելացել է: Գնողական պահանջարկի կտրուկ աճի պատճառների մասի պաշտոնական տեղեկություններ չկան: Հնարավոր է, որ արտոնյալ պայմաններով պետական աջակցությամբ բնակարանի ձեռքբերման ծրագրերի հերթական փուլն է իրականացվել:
Մայիսից եւս մեկ՝ ոչ պակաս հետաքրքիր լուր կա. պաշտոնական գների դինամիկա: Նախ հիշեցնենք, որ ապրիլին Երեւանում բնակարանների «քառակուսու» միջին շուկայական գները նվազեցին: Ընդ որում՝ առանց բացառության բոլոր վարչական շրջաններում: Մայիսին անկումը պահպանվել է՝ բացառությամբ Կենտրոն վարչական շրջանի: Այստեղ բնակարանների մեկ քառակուսի մետրը, անցյալ տարվա մայիսի համեմատ, բարձրացել է 22 հազար դրամով (շուրջ 45 դոլար):
Իսկ մայիսին առավելագույն նվազումը գրանցվել է Դավիթաշեն վարչական շրջանում (26.7 հազար դրամ), Աջափնյակում (24.7 հազար դրամ) եւ Նոր Նորքում (24.2 հազար դրամ): Մեր հաշվարկներով՝ Երեւանում բնակարանների մեկ քառակուսի մետր մակերեսի արժեքը միջինը նվազել է 13 հազար դրամով: Ներկայացվող աղյուսակում ներկայացվում է մայրաքաղաքի վարչական շրջաններում բնակարանների «միջին» արժեքը՝ միլիոն դրամով: Տարեկան անկումը (աճը) ներկայացված է նաեւ ամերիկյան դոլարով:
Միջին արժեքի հաշվարկը կատարվել է ըստ մայրաքաղաքի վարչական շրջանների բնակֆոնդի տարբերակման եւ միջին բնակմակերեսի հիման վրա: Այդ պատճառով ստացված տվյալները որոշակիորեն պայմանական բնույթ ունեն եւ կարող են օգտագործվել միայն համեմատության համար: Հայաստանում վերջին շրջանում դոլարի փոխարժեքը համեմատաբար կայուն է (մեկ տարվա ընթացքում ամրապնդվել է «ընդամենը» 1.1%-ով), այդ պատճառով այդ գործոնը կարելի է հաշվի չառնել:
Սմբատ Գրիգորյան