ԵՏՄ անդամ երկրները տնտեսական աճի ճանապարհին են: Նման եզրակացության է հանգել «Եվրասիական փորձագիտական ակումբը»` Եվրասիական տնտեսական միությանը Հայաստանի անդամակցությունից հետո 2017 թվականի առաջին 5 ամիսներին Հայաստանի տնտեսական վիճակի ենթատեքստում կատարված հետազոտության արդյունքներով: Այս մասին հուլիսի 15-ին` լրագրողների հետ հանդիպման ժամանակ ասաց «Ինտեգրում եւ զարգացում» հասարակական կազմակերպության նախագահ, «Եվրասիական փորձագիտական ակումբի» համակարգող Արամ Սաֆարյանը:
Սաֆարյանը նշեց, որ Ռուսաստանի Կենտրոնական բանկի նախագահը հայտարարել է, որ Ռուսաստանը մտնում է իր տնտեսական զարգացման նոր փուլ, եւ Ռուսաստանին լավ տարի է սպասվում: Համակարգողի խոսքով` դրանից բացի, կանխատեսվող վարկանիշները եւս տնտեսական աճի նոր ցուցանիշներ են խոստացել:
«Տնտեսական զարգացման այս կանխատեսումները, որոնք կատարվել են 2017 թվականի համար, Հայաստանի համար կարող են կազմել 2,5-ից մինչեւ 3 տոկոս, հնարավոր է` նույնիսկ 3,4 տոկոս: Հիշեցնենք, որ 2016 թվականին տնտեսական աճը կազմել է ընդամենը 0,2 տոկոս»,- պարզաբանեց ՀԿ նախագահը:
Սաֆարյանը նշեց, որ ամենաբարձր ցուցանիշները գրանցվել են պատրաստի արտադրանքի արտահանման ոլորտում:
«Մենք դրական ենք տրամադրված զարգացման այնպիսի ուղղությունների նկատմամբ, ինչպիսին են, օրինակ, վերամշակումը, տեքստիլ եւ կոշիկի արտադրությունը, որոնք, թվում էր, անելանելի վիճակում են: Սակայն ԵՏՄ շնորհիվ զարգացման հնարավորություն է ստեղծվել»,- հայտարարեց Արամ Սաֆայանը: