Հուրգադայի հյուրանոցներից մեկի տարածքում հուլիսի 14–ին տեղի ունեցած հարձակման դեպքը, որի հետեւանքով երկու մարդ էր մահացել, խուճապ է առաջացրել Հուրգադայում հանգստի մեկնողների մի մասի շրջանում։ «ֆեյսբուք» սոցիալական ցանցում քննարկումները հակասական են։ Օգտատերերի մի մասը անհանգստացած է, իսկ մի մասը կարծում է, որ եթե ահաբեկչական դեպք չէ, ապա կարելի է մեկնել, քանի որ այդպիսի հարձակում կարող է տեղի ունենալ ցանկացած երկրում եւ միջավայրում։
Դեպի Եգիպտոս ուղիղ չվերթներ իրականցնող տուրիստական ընկերությունների ներկայացուցիչները NEWS.am–ի հետ զրույցում վստահեցրին, թե բնականոն հունով շարունակվում են ամրագրումները։
«ANRIVA» տուրիստական ընկերության PR մենեջեր Սառա Կոստանդյանը մեզ հետ զրույցում ասաց, որ դեռ որեւէ մեկը չեղյալ չի հայտարարել նախապես ամրագրած տոմսը. «Մեր ընկերության հետ ոչ մի խնդիր չկա, մենք բնականոն հունով աշխատում ենք։ Այս պահի դրությամբ չկան մարդիկ, որ տոմսերը հետ են տվել կամ ցանկացել են նման բան անել։ Վստահեցնում եմ՝ Հուրգադա այցի հետ կապված ոչ մի տիպի անհանգստություն դեռեւս չկա, ամրագրումները շարունակվում են»,–հավաստիացրեց նա։
Շաբաթվա ընթացքում երկու ուղիղ չվերթ իրականացնող «Sky» տուրիստական ընկերության գործադիր տնօրեն Ալեքսանդր Միրաքյանն էլ վստահեցրեց, որ որեւէ քաղաքացի չի հրաժարվել իր ամրագրած փաթեթից։
«Այդպիսի դեպք ցանկացած հանգստավայրում եւ ոչ հանգստավայրային քաղաքում, ցավոք, կարող է լինել, դա ահաբեկչություն չէր, հարձակվողը Եգպիտոսի բնակիչ է, որը, անձնական դրդապատճառներոցվ հարձակվել է մարդկանց վրա։ Մենք անձամբ կապի մեջ ենք եղել մեր զբոսաշրջիկների հետ, ամեն ինչ կարգին է եղել, ավելին՝ մեր ներկայացուցչ ը այցելել է հիվանդանոց, վիրավորված հայերի առողջական վիճակի մասին տեղեկություն հաղորդել մեզ, որեւէ մեկի կյանքին վտանգ չի սպառնում։ Կարծում եմ, որ Հուրգադա հանգստի մեկնողները գիտակցում են, որ այդպիսի դեպք կարող է տեղի ունենալ ամեն տեղ ու շարունակում են մեկնել։ Ես վստահեցնում եմ, որ դեռեւս որեւէ մեկը չի հրաժարվել մեկնումից»։
«Crystal Travel» տուրիստական գործակալության հիմնադիր տնօրեն Ալլա Խաչատրյանը մեզ հետ զրույցում հայտնել է, որ քանի որ այս պահին Հուրգադայում հանգստացողներ չունեն, բողոքներ, կամ փաթեթներ վերադարձնելու ահազանգեր էլ չեն ստացել:
Այս գործակալությունում չեն խրախուսում Հուրգադայում հանգստանալը, հատկապես 4-աստղանի հյուրանոցներում, սակայն այդ տարբերակը ունի պահանջարկ, քանի որ գները անհամեմատ մատչելի են: «Եթե մեր հաճախորդները ուզում են գնալ Եգիպտոս, ապա մենք խորհուրդ ենք տալիս ընտրել 5-աստղանի տարբերակը եվ նախընտրել հյուրանոց, որոնք պատկանում են որեւէ հյուրանոցային ցանցի: Այդ դեպքում գները նույնպես ավելի մատչելի են, քան ուրիշ երկրներում, սակայն ավելի շատ երաշխիքներ կան, որ հյուրանոցը ավելի լավը կլինի» ։