Լեռնային Ղարաբաղում առաջին անգամ իրականացվել է հետազոտություն, որն ուղղված է գործատուների հիմնական խնդիրների բացահայտմանը։ Այս մասին լրագրողների հետ զրույցում հուլիսի 17-ին հայտնել է Զբաղվածության ու սոցիալական հետազոտությունների ազգային ինստիտուտի տնօրեն Արման Սարգսյանը։
Նրա խոսքով, հետազոտությունն իրականացրել է Զբաղվածության ու սոցիալական հարցերի նախարարության զբաղվածության ու սոցիալական հետազոտությունների ազգային ինստիտուտը։
«Հետազոտությանը մասնակցել է 423 գործատու։ Տվյալ ընկերությունների ստեղծման ժամանակի հետազոտությունը ցույց է տվել, որ դրանք միջինը 12․8 տարեկան են։ Ընկերությունների աշխատակիցների 37․5 տոկոսը, որոնք մասնակցել են հետազոտությանը, ունեն բարձրագույն կրթություն։ 27․7 տոկոսը՝ միջին կամ տարրական մասնագիտական, իսկ 36․6 տոկոսը չունի մասնագիտական կրթություն»,- նշել է Զբաղվածության ու սոցիալական հետազոտությունների ազգային ինստիտուտի տնօրենը՝ հավելելով միաժամանակ, որ աշխատակիցների 48 տոկոսը տվյալ ընկերություններում կանայք են։
Սարգսյանը նշել է, որ հետազոտության մեջ ընդգրկված ընկերությունների զգալի մասն աշխատում է մեծածախ ու մանրածախ առեւտրի ոլորտում։ Մյուս զգալի խումբը կազմել են կրթությամբ, գիտոթյամբ, առողջապահությամբ, սոցիալական պաշտպանությամբ, մշակույթով զբաղվող, նաեւ հանգստի կազմակերպման ու անցկացման ոլորտի ընկերությունները։