Վերաքննիչ քրեական դատարանը բավարարել էր բանակում ծեծի ենթարկվելու հետեւանքով հոգեկան խնդիրներ ձեռքբերած Արթուր Հակոբյանի շահերի պաշտպան Արա Ղարագյոզյանի բողոքը: NEWS.am-ի հետ զրույցում Արթուր Հակոբյանի շահերի պաշտպան Արա Ղարագյոզյանը նշեց, որ այս պահին սպասում են. դատախազությունը, եթե վճռաբեկ բողոք բերի, երեք ամիս պետք է սպասեն, իսկ եթե ոչ` Սյունիքի մարզի ընդհանուր իրավասության դատարանը կարճման դեմ ներկայացրած բողոքի դատաքննություն կիրականացնի:
Արա Ղարագյոզյանը նաեւ նշեց, որ չնայած դատախազությունը Արթուր Հակոբյանին ծեծի ենթարկելու գործով հարուցված քրեական գործը կարճել էր, սակայն, պաշտպանական կողմը շարունակում է պնդել, որ Արթուրն իր առողջական խնդիրները ձեռք է բերել բանակում. «Արթուրը Վերաքննիչ բողոքի քննությանը դատարն եկել էր, սակայն, շատ վախեցած էր»:
Ավելի վաղ տեղեկացրել էինք, որ Արթուր Հակոբյանին ծեծի ենթարկելու գործը կարճվել էր հանցադեպի բացակայության հիմքով: ՀՀ քննչական կոմիտեի զինվորական քննչական գլխավոր վարչության 9-րդ կայազորային քննչական բաժնում հարուցվել էր քրեական գործ՝ զինվորական ծառայության պարտականությունները կատարելու կապակցությամբ ստորադասին ծեծելու դեպքի առթիվ, 2015թ. նոյեմբերի 13-ին որոշում էր կայացվել քրեական գործ հարուցելու մասին, իսկ զինծառայող Արթուր Հակոբյանը ճանաչվել էր տուժող:
Արթուր Հակոբյանը 2015թ. նոյեմբերի 6-ին հոգեկան խնդիրներով Երեւանի կայազորային հոսպիտալ էր տեղափոխվել: Արթուրն ու նրա հարազատները պնդում են, որ զինծառայողին բանակում ծեծել է գումարտակի հրամանատար Ջիվան Մկրտչյանը՝ հարբած վիճակում, որի հետեւանքով էլ ձեռք է բերել առողջական խնդիրներ:
Նշենք, որ 19-ամյա Արթուր Հակոբյանը, թեեւ հոսպիտալից տուն է տեղափոխվել, բայց չի ապաքինվել. պարբերաբար ուշագնաց է լինում, սրտխառնոցներ ունենում: Արթուրին լուրջ հետազոտություն եւ բուժում է հարկավոր, սակայն, ընտանիքը բավականաչափ գումար չունի:
