Արցախի խորհրդարանը հուլիսի 21-ին արտահերթ նստաշրջան կգումարի:
Արցախի Ազգային ժողովում, այսօր՝ հուլիսի 20-ին, հրավիրվել է աշխատանքային խորհրդակցություն, որը վարել է խորհրդարանի նախագահ Աշոտ Ղուլյանը: Արցախի ԱԺ-ից NEWS.am-ին հայտնում են, որ խորհրդակցությանը մասնակցել են ԱԺ մշտական հանձնաժողովների, խմբակցությունների ղեկավարները եւ աշխատակազմի պատասխանատուները:
Խորհրդարանի ղեկավարը ներկաներին տեղեկացրել է հուլիսի 21-ին արտահերթ նստաշրջան գումարելու Կառավարության նախաձեռնության մասին:
Նախաձեռնողի կողմից առաջարկվել է Ազգային ժողովի քննարկմանը երկրորդ ընթերցմամբ ներկայացնել Արցախի Հանրապետության Դատական օրենսգիրքը՝ կից օրենսդրական փաթեթով եւ Հաշվեքննիչ պալատի մասին Արցախի Հանրապետության օրենքը՝ ուղեկցող օրենսդրական փաթեթով:
Ներկայացված օրակարգային հարցերի պատրաստվածության վերաբերյալ տեղեկություններ են հաղորդել պետական-իրավական հարցերի եւ ֆինանսաբյուջետային ու տնտեսական կառավարման հարցերի մշտական հանձնաժողովների ղեկավարները:
Ամփոփելով խորհրդակցության արդյունքները՝ Աշոտ Ղուլյանը հրապարակել է Ազգային ժողովի նախագահի որոշումը՝ Կառավարության նախաձեռնությամբ խորհրդարանի արտահերթ նստաշրջանը հուլիսի 21-ին ժամը 11-ին գումարելու մասին: