Երեւանի Շենգավիթ վարչական շրջանի ընդհանուր իրավասության դատարանում այսօր՝ հուլիսի 21-ին, Ժիրայր Սեֆիլյանի եւ մյուսների գործով դատական նիստի հենց սկզբին պաշտպաններ Ար ա Զաքարյանն ու Նինա Կարապետյանցը լքեցին դահլիճը:
NEWS.am-ի թղթակիցը հաղորդում է, որ Ժիրայր Սեֆիլյանի պաշտպան Արա Զաքարյանը եւ Ներսես Պողոսյանի պաշտպան Նինա Կարապետյանցը լքեցին նիստերի դահլիճը. նրանք պահանջում էին դատարանում ապահովել իրենց պաշտպանյալների ներկայությունը, քանի որ նրանց բացակայությամբ իրենք չեն կարող նիստը շարունակել:
Դատավոր Տաթեւ Գրիգորյանը պնդում էր, որ ամբաստանյալները մի պայմանով կարող են ներկա լինել դատական նիստին, եթե անհարգալից վերաբերմունք չդրսեւորեն դատարանի նկատմամբ եւ ոտքի կանգնեն, երբ դատավորն է ներս մտնում:
Քանի որ միջնորդությունը չբավարարվեց, պաշտպանները լքեցին նիստերի դահլիճը:
Դատավորը մեկ ժամով ընդմիջում հայտարարեց եւ հեռացավ խորհրդակցական սենյակ՝ պաշտպանների նկատմամբ դատական սանկցիա կիրառելու հարցը քննարկելու:
Ի դեպ, արդեն դրսում, «Հիմնադիր խորհրդարանի» մամուլի խոսնակ Սյուզան Սիմոնյանը ընթերցեց Ժիրայր Սեֆիլյանի գրությունը, որը նրան էր հասել այսօր։ Սեֆիլյանը կոչ է արել հանրությանը՝ մասնակցել Ավան եւ Նոր Նորք վարչական շրջանների ընդհանուր իրավասության դատարանում տեղի ունեցող՝ Սասնա ծռերի դատերին ու սատար կանգնել նրանց։
Հիշեցնենք, որ Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Բացի Սեֆիլյանից, մեղադրանք է առաջադրվել նաեւ Գեւորգ Սաֆարյանին, Ներսես Պողոսյանին, Գալուստ Գրիգորյանին, Հրայր Թոփչյանին, Սասունիկ Կիրակոսյանին եւ Հովհաննես Պետրոսյանին:
Այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն անցկացվում են արտագնա` Շենգավիթ վարչական շրջանի ընդհանուր իրավասության դատարանում:
