Արցախն ապրում է ոչ այն բանի համար, որպեսզի ինչ-որ մեկին դուր գա կամ չգա: Հուլիսի 21-ին լրագրողների հետ հանդիպմանն այս մասին հայտարարեց Կովկասի ինստիտուտի տնօրեն, քաղաքագետ Ալեքսանդր Իսկանդարյանը՝ պատասխանելով հարցին, արդյո՞ք Արցախում անցկացված ընտրությունները չեն ազդի երկրի միջազգային վարկանիշի վրա:
Քաղաքագետը նշեց, որ Արցախում անցկացվող ընտրությունները որոշակի գործընթացներ են, որոնք տեղի են ունենում երկրի ներսում, եւ կապված են միայն արցախյան հասարակության եւ հանրապետության զարգացման հետ:
«Դա զարգացման այլ փուլ է: Մենք հիշում ենք, երբ Արկադի Ղուկասյանը որոշումներ կայացրեց եւ չգնաց նախագահության ժամկետը երկարաձգելուն: Բայց դա այլ ժամանակ էր: Հույս կար, որ ժողովրդավարություն ցուցադրելու դեպքում հնարավոր կլինի ազդել ղարաբաղյան հարցով միջազգային հանրության որոշումների վրա՝ հօգուտ Արցախի»,- պարզաբանեց քաղաքագետը՝ միաժամանակ հավելելով, որ հիմա նման հույսեր այլեւս չկան:
Հիշեցնենք, որ հուլիսի 19-ին Արցախում անցումային շրջանի նախագահի ընտրություններ էին: ԱԺ-ի հատուկ նիստում նախագահ վերընտրվեց Բակո Սահակյանը: