Մեղրի-Նորդուզ հսկիչ անցակետի համատեղ շահագործման համաձայնագրի հիմնական նպատակը համատեղ հայ-իրանական հեռանկարային տնտեսական ծրագրերի իկրականացումն է: Այս մասին հուլիսի 24-ին՝ լրագրողների հետ հանդիպման ժամանակ ասաց իրանագետ Արմեն Իսրայելյանը:
Ինչպես նշեց փորձագետը, Մեղրի-Նորդուզ հսկիչ անցակետի համատեղ օգտագործման հետ կապված օրինագիծը մի քանի անգամ քննարկվել է Իրանի խորհրդարանում եւ ընդունվել է միայն օրերս: «Համաձայնագիրը վերաբերում է ե՛ւ տարանցվող բեռնափոխադրումներին, ե՛ւ երկկողմանի ապրանքաշրջանառության ծավալների աճին, ե՛ւ էներգետիկ պաշարների տարանցմանը»,- պարզաբանեց Իսրայելյանը:
Իրանագետի խոսքով՝ որպեսզի հայ-իրանական հսկիչ անցակետերում մաքսային ընթացակարգերն ավելի արագ իրականացվեն, անհրաժեշտ կլինի համատեղ աշխատանքային խումբ ստեղծել, որը կզբաղվի այս հարցերով: Փորձագետը նաեւ հիշեցրեց, որ 2015 թվականին Հայաստանի եւ Իրանի միջեւ առեւտրաշրջանառությունը կազմել է 120 – 130 մլն դոլար, իսկ 2016-ին՝ արդեն 170 մլն դոլար: «Չնայած սրան, ե՛ւ իրանական, ե՛ւ հայկական կողմերը դժգոհ են առեւտրաշրջանառության նման ցածր մակարդակից, քանի որ կարծում են, որ առկա պոտենցիալը շատ ավելի զգալի է»,- նշեց Արմեն Իսրայելյանը՝ դրա հետ մեկտեղ հույս հայտնելով, որ այս համաձայնագիրը կնպաստի փոխադարձ ապրանաշրջանառության ծավալների աճին:
