Չինաստանի ոստիկանությունը արգելված կրոնական պաշտամունքի անդամ 18 կասկածյալների է ձերբակալել, հայտնում է «Սինհուան»:
Այսպես կոչված, Ամենազոր Աստծո եկեղեցու անդամները հայտնի են դարձել 2014 թվականին McDonald's ռեստորանում մի կնոջ մահացու ծեծելով, երբ նա հրաժարվել է նրանց տալ իր հեռախոսահամարը:
Աղանդը Չինաստանում հիմնադրվել է 1990-ական թվականներին: Աղանդի հետեւորդները հավատում են, որ Հիսուս Քրիստոսը հարություն է առել չինուհու տեսքով, որը Երկիր է վերադարձել հայտնություն իրականացնելու: Միակ մարդը, որն իբր այս տիկնոջ հետջ շփվել է, ֆիզիկայի նախկին ուսուցիչ Չժաո Վեյշանն է, որը պաշտամունքը հիմնադրել է 25 տարի առաջ, այնուհետեւ ԱՄՆ է փախել:
Ոստիկանությունը համակարգիչներ եւ գրքեր է առգրավել, որոնք պաշտամունքի անդամներն օգտագործում են համախոհներ հավաքագրելու համար:
Նշվում է, որ Ամենազոր Աստծո եկեղեցին անդամներին մեկուսացնում է ընկերներից եւ ընտանիքներից, նրանց վրա ճնշում է գործադրում փրկության դիմաց դրամական նվիրատվություններ կատարելու համար: