Երեւանի նոր տրանսպորտային ցանցի նախագիծը մինչեւ 2017 թվականի սեպտեմբեր պատրաստ կլինի: Օգոստոսի 11-ին լրագրողների հետ հանդիպմանն այս մասին հայտնեց Երեւանի փոխքաղաքապետ Վահե Նիկոյանը:
Նրա խոսքով՝ դրանից հետո մեկ ամսվա ընթացքում կարելի է հաշվարկել նաեւ երթուղայինների ամբողջ ցանցի ֆինանսական չափորոշիչները՝ կախված այն հանգամանքից, թե քանի ուղեւորի փոխադրելու հնարավորություն ունեցող քանի ավտոբուս է պետք: 2018 թվականի սկզբին պատրաստ կլինի նաեւ ֆինանսական գնահատականը, որը կներկայացվի պոտենցիալ ներդրողներին:
Նիկոյանի խոսքով՝ ամենայն հավանականությամբ, ցանցը կբաժանեն գլխավոր եւ երկրորդային երթուղիների: Գլխավորներում միայն միջին եւ խոշոր ավտոբուսներ կշահագործվեն. ավելի խոշոր, քան հիմա: Երթուղիներում միկրոավտոբուսներ կա՛մ չեն լինի, կա՛մ գրեթե չեն լինի: Բացառություն կարվի միայն այն դեպքում, երբ տրանսպորտի համար նախատեսված փողոցներում ավտոբուսների անցանելիությունը հնարավոր չի լինի:
Նախատեսվում է էլեկտրոնային տոմսեր ներդնել, բայց առայժմ որոշված չէ, թե ինչպիսի սակագին կսահմանվի: Սակագինը կարող է հաշվարկվել՝ ըստ ճանապարհի երկարության, քաղաքի գոտիների կամ երթեւեկության ժամանակի: