«Ժառանգության» նախաձեռնությունը փողոցային պայքար սկսելու վերաբերյալ ոչ ստրատեգիական, ոչ էլ տակտիկական տեսանկյունից հաջողություն չի ունենա: Այս մասին այսօր՝ օգոստոսի 14-ին, NEWS.am-ի հետ զրույցում ասաց քաղտեխնոլոգ Արմեն Բադալյանը: Նրա խոսքով, երբ «Ժառանգությունը» հայտարարում է խորհրդարանական եւ արտախորհրդարանական ուժերի հետ բանակցություններ սկսելու եւ փողոցային պայքար դուրս գալու մասին, նախ պետք է հաշվի առնի, թե յուրաքանչյուր ուժ ինչպես է պատկերացնում իշխանափոխությունն ու դրանից հետո Հայաստանի ապագան:
«Պետք է հաշվի առնել, թե ինչն է ընկած բանակցությունների հիմքում: Եթե բանակցությունների հիմքում ընդամենը գործադիր իշխանությունների դեմ պայքարն է՝ իշխանափոխության համար, արդյունք չի տա, որովհետեւ յուրաքանչյուր ուժ իր նպատակը, պատկերացումներն ունի իշխանությունների դեմ պայքարում: Պետք է հասկանալ նաեւ, թե Հայաստանն իշխանափոխությունից հետո ի՞նչ ճանապարհով պետք է զարգանա՝ խորացնելու է հարաբերությունները արեւմտյան կառույցների հետ, թե ռուսական կողմի հետ: Նախ պետք է որոշել, թե յուրաքանչյուր ուժ ինչպես է պատկերացնում Հայաստանի հետագա զարգացումը եւ ըստ այդմ բանակցություններ վարել այն ուժի հետ, որը իրենց տեսակետն ունի, այնուհետեւ նոր գնալ իշխանափոխության: Սա հենց առաջին պատճառն է, թե ինչու կուսակցության նախաձեռնությունը հաջողություն չի ունենա վերացական միավորման տեսակետից»,-ասաց նա:
Քաղտեխնոլոգի խոսքով, կարեւոր է նաեւ, որպեսզի «Ժառանգության» եւ այլ ուժերի միավորումը գործողություններով ուղեկցվի. «Երբ միավորվել ես ցանկանում, պետք է միավորումը ոչ միայն հռչակագրային լինի, այլեւ գործողություններով ուղեկցվի՝ Արեւմտյան կամ ռուսական ինտեգրացիոն համակարգի հետ: Այսինքն՝ կամ պետք է արեւմտյան կառույցները աջակցեն, կամ էլ ռուսական: Բնականաբար արեւմտյան կառույցները չեն աջակցի այդ շարժմանը, որովհետեւ չգիտեն դրա ապագան, նույնն էլ ռուսականին է վերաբերվում»:
Արմեն Բադալյանը նաեւ նշեց, որ պայքարը կարեւոր է նաեւ տակտիկական առումով. պետք է հաշվի առնել փողոցային պայքար սկսելու հնարավորությունը, որն այս պայմաններում Հայաստանում շատ դժվար է պատկերացնել:
«Երկար ժամանակով Հայաստանում փողոցային պայքարի մասին պետք է մոռանալ, որովհետեւ Հայաստանում մարդ չի մնացել, որպեսզի փողոցային պայքարի դուրս գա՝ շատերն արտագաղթել են, մի մասը պատրաստվում է արտագաղթել եւ այս պահի դրությամբ դժվար է մարդկանց փողոց դուրս բերել: Հասարակության այն մասը, որը ավելի արեւմտամետ է՝ ռուսամետի հետ փողոց դուրս չի գա, չգիտեն՝ իշխանափոխությունից հետո ինչ կլինի»:
