Հայաստանում 2017թ. օգոստոսի 14-ի դրությամբ բուժվող հիվանդի մահվան համար դատապարտված 1 անձ է պատիժ կրում քրեակատարողական հիմնարկներում:
NEWS.am-ի գրավոր հարցմանն ի պատասխան քրեակատարողական վարչության հանրային կապերի բաժնի պետ Գոռ Ղլեչյանը հայտնել է հետեւյալը. «ՀՀ ԱՆ քրեակատարողական հիմնարկներում 2017թ. օգոստոսի 14-ի դրությամբ ՀՀ Քրեական օրենսգրքի 130-րդ հոդվածի հատկանիշներով (Բժշկական օգնություն և սպասարկում իրականացնողների կողմից մասնագիտական պարտականությունները չկատարելը կամ ոչ պատշաճ կատարելը) հանցանք կատարելու համար պատիժը կրում է 1 անձ, որը գտնվում է «Աբովյան» քրեակատարողական հիմնարկի բաց ուղղիչ հիմնարկում»:
Թե ով է այդ անձը, ՔԿՎ-ն չի հայտնում: Հետաքրքիր է, որ 2016թ.-ին Հանրապետությունում 4 բժիշկ է մեղավոր ճանաչվել եւ դատապարտվել: Նրանցից երեքի նկատմամբ դատարանն ազատազրկման դատավճիռ է կայացրել: Երկուսի վերաբերյալ դատավճիռներն արդեն մտել են օրինական ուժի մեջ: Գյումրիի բժշկական կենտրոնի ռադիոլոգ Նազանի Մալխասյանը 2.5 տարվա ազատազրկման է դատապարտվել վթարի ժամանակ բազմաթիվ վնասվածքներ ստացած Լեւոն Դարբինյանի ոչ պատշաճ բուժօգնություն ցուցաբերելու համար: Արմավիրի բժշկական կենտրոնի ինֆեկցիոն բաժանմունքի վարիչ Անահիտ Պետրոսյանն էլ 3 տարվա ազատազրկման է դատապարտվել 4-ամյա Կարինեի եւ 5-ամյա Էրիկի մահվան համար: Մեզ հայտնի է դարձել, որ Անահիտ Պետրոսյանը պատիժը կրում է բաց ռեժիմով: Այս մասին ավելի վաղ հաստատել էր նաեւ Պետրոսյանի պաշտպանը: Թերեւս ՔԿՎ-ի հայտնած այդ մեկ անձը հենց արմավիրցի բժշկուհին է: Այդ դեպքում որտե՞ղ է Նազանի Մալխասյանը: Հատկանշական է, որ նրա վերաբերյալ տեղեկատվություն հրաժարվում են տալ նրա փաստաբանները: Գյումրիի բժշկական կենտրոնը նույնպես այս հարցի մասին լռում է: Նշենք, որ երբ Վճռաբեկի որոշումից հետո դատավճիռը մտավ օրինական ուժի մեջ, Մալխասյանը գտնվում էր արձակուրդում:
Հիշեցնենք, որ առաջին ատյանի դատավճռով ազատազրկման էր դատապարտվել նաեւ 40 օրական երեխայի մահվան մեջ մեղադրվող՝ Հրազդան բժշկական կենտրոնի մանկաբույժ Մարինե Հակոբյանը: Նրա պաշտպանը Վերաքննիչ է դիմել եւ բողոքի քննությունը շարունակվում է:
