Ազգային ժողովի «Ելք» խմբակցության պատգամավոր Էդմոն Մարուքյանը կարծում է, որ ոչ պաշտոնապես հրահանգ կա խնդիրներ չառաջացնել ՌԴ-ում աշխատող ՀՀ վարորդական իրավունք ունեցողների համար:
«Ռուսաստանում աշխատող մարդկանցից, սակայն, ինձ գրել են, որ ներկայումս խնդիր չեն առաջացնում: Ենթադրում եմ, որ ոչ պաշտոնապես հրահանգ կա, որ չանհանգստացնեն, մինչեւ վերջնական իրավական ձեւակերպումները տրվեն: Ամեն դեպքում ԵԱՏՄ համաձայնագրի դրույթները պետք է անմիջականորեն կիրառվեին մինչ այդ, եւ որեւէ խնդիր չպետք է լիներ: Խնդիրն արհեստական էր եւ արհեստական էլ պահվել է, որ Հայաստանը գնա, բանակցի, ինչ որ հարցերում զիջումներ անի: Մենք մեր անելիքն արել ենք, եւ գրավոր, եւ բանավոր դիմել ենք, եւ խնդիրը չի կարող չլուծվել»,- NEWS.am-ի թղթակցի հետ զրույցում ասաց Էդմոն Մարուքյանը:
Հիշեցնենք, որ ըստ ՌԴ-ի Կառավարության տարածած հաղորդագրության՝ օգոստոսի 14-ին Աստանայում կայացած Եվրասիական միջկառավարական խորհրդի նիստում ԵՏՄ երկրներից մեկում տրված ազգային ու միջազգային վարորդական իրավունքներն ընդունելու հանձնարարական է ստորագրվել՝ Միության մյուս անդամ երկրում ձեռնարկատիրական գործունեություն ծավալելու համար։ Կարեն Կարապետյանի մամուլի խոսնակ Արամ Արարատյանը NEWS.am-ի հետ զրույցում նշեց, որ այդ հարցը ԵՏՄ նիստում բարձրացրել է ՀՀ վարչապետը:
«Այժմ այս հարցը գտնվում է օրակարգում եւ քննարկումները շարունակվում են Հայաստանի եւ Ռուսաստանի Կառավարությունների միջեւ»,- ասաց վարչապետի մամուլի խոսնակը:
Ավելի վաղ հայտնել էինք, որ ՌԴ Պետդումայի հունիսի 1-ի օրենսդրական փոփոխության համաձայն, ուն ընդունվեց, ըստ որի Հայաստանի վարորդական իրավունքը Ռուսաստանում չի ճանաչվելու: Այս փոփոխությունը վերաբերում է ԵՏՄ անդամ երկրներից միայն Հայաստանին, քանի որ մեր երկրում ռուսերենը պաշտոնական լեզու չէ:
