Սկանդալային բացահայտումներով հայտնի WikiLeaks կայքը հրապարակել է նաեւ մի փաստաթուղթ, որից պարզ է դառնում, որ Հայաստանում չկա որեւէ օբյեկտ, որն ԱՄՆ շահերի տեսանկյունից կենսական նշանակություն ունենա:
WikiLeaks-ը հրապարակել է աշխարհի տարբեր երկրներում սփռված այն օբյեկտների ցանկը, որոնք, ամերիկացի դիվանագետների գնահատմամբ, կենսական են ամերիկյան ազգային շահերի տեսանկյունից: Ցանկն ընդգրկում է նավթամուղներ, տրանսպորտային, հեռահաղորդակցական հանգույցներ եւ այլ օբյեկտներ:
Ըստ այդ հրապարակման` 2009 թվականի փետրվարին ԱՄՆ-ի Պետդեպարտամենտը հրահանգել է արտերկրում գտնվող ամերիկյան դիվանագիտական ներկայացուցչություններին` կազմել Միացյալ Նահանգների ազգային շահերի համար կենսական օբյեկտների ցանկը, ինչը եւ արվել է:
Հայաստանի հարեւան երկրներում առկա օբյեկտներից նշված են Ադրբեջանով, Վրաստանով եւ Թուրքիայով անցնող Բաքու - Թբիլիսի - Ջեյհան նավթամուղը, Բաքվի մոտ գտնվող Սանգաչալի նավթային տերմինալը, Թուրքիայում` Բոսֆորի նեղուցը, Իրանում` Հորմուզի նեղուցը: Հաղորդում է «Ազատություն» ռադիոկայանը: