Թուրքիայի էկոնոմիկայի նախարար Նիհաթ Զեհյբեքչիի հայտարարությունը, որ Անկարան ցանկություն ունի միանալ ԵՏՄ-ին, Բրյուսելի եւ Վաշինգտոնի համար նախատեսված սովորական շանտաժ է։ NEWS.am-ի թղթակցի հետ զրույցում նման կարծիք հայտնեց քաղաքագետ Ստեփան Գրիգորյանը։ 

Նրա կարծիքով՝ Անկարան ընդամենը փորձում է իր վրա ուշադրություն հրավիրել։

«Թուրքիայի եւ Գերմանիայի հարաբերությունները փչացել են։ Վատթարացել են նրա հարաբերությունները նույնիսկ ԱՄՆ-ի հետ։ Դա կապված է Անկարայի վարած ներքին եւ արտաքին քաղաքականության հետ։ Բազմաթիվ մարդիկ՝ քաղաքացիական անձինք, լրագրողներ, քաղաքական գործիչներ եւ նույնիսկ զինծառայողներ, ձերբակալվում են, հետապնդվում գործող ռեժիմի կողմից»,-հստակեցրեց փորձագետը՝ հավելելով, որ Վաշինգտոնն ու Բեռլինը հազիվ թե «խաբվեն»։

Գրիգորյանի կարծիքով՝ եթե Թուրքիան իսկապես ցանկանա ԵՏՄ մուտք գործել, այնտեղ ուրախ կլինեն դրա համար։ Քաղաքագետի խոսքով՝ թուրքական ապրանքները Եվրասիական շուկայում կարող են լուրջ մրցակցություն ստեղծել։

«Թուրքական ապրանքներն ավելի մրցունակ են։ Թուրքիայի համար բարդ չի լինի կարճ ժամկետում ամրապնդվել Եվրասիական շուկայում։ Չ՞է որ նրա ապրանքները, մյուսների համեմատ ավելի էժան են։ Եվ հանուն արդարության պետք է նշել, որ դրանք նաեւ ավելի որակյալ են, եթե նույնիսկ որակով չեն գերազանցում մրցակցին»,-հստակեցրեց փորձագետը։

Քաղաքագետը նշեց, որ Թուրքիայի՝ ԵՏՄ-ին անդամակցելու հարցում նվազագույնը շահագրգռված է Ռուսաստանը, քանի որ այն, այսպես ասած, հովանավորող քաղաքականություն է վարում՝ ուղղված սեփական արտադրողի շահերը պաշտպանելուն։

«Վերջիվերջո, եթե նույնիսկ բոլորը համաձայնեն Թուրքիային ԵՏՄ-ում ընդունել, Հայաստանը միշտ կարող է օգտվել վետոյի իրավունքից։ Չէ՞ որ միության միայն բոլոր անդամների համաձայնության պարագայում դրա շարքերում հնարավոր կլինի նոր անդամի ընդունել»,-ընդգծեց Գրիգորյանը։