VST Enterprises բրիտանական ընկերությունը, որը զբաղվում է կիբերանվտանգությամբ, հայտարարել է Հայաստանում գրասենյակ բացելու մասին: Ընկերությունը հայտնի է VCode տեխնոլոգիայի մշակմամբ, որն իսկական օգտատերերին թույլ է տալիս օնլայն գործողությունների ժամանակ ինքնանույնականացում կատարել: NEWS.am-ը զրուցել է VST Enterprises-ի գլխավոր տնօրեն Լուիս Ջեյմս Դեւիսի հետ՝ պարզելու համար, թե Հայաստանում տեղեկատվական տեխնոլոգիաների առումով ինչն է գրավում ընկերությանը:
VST Enterprises-ը մի քանի ՏՏ ընկերություններից մեկն է, որը հայտարարել է այս տարի Հայաստանում գրասենյակ բացելու մասին: Ինչո՞վ է պայմանավորված Հայաստանի ընտրությունը Հարավային Աֆրիկայի եւ Ասիա-Խաղաղօվկիանոսյան տարածաշրջանի շարքում:
Մայրցամաքային Եվրոպայում Հայաստանը VST Enterprises-ի գրասենյակի համար կատարյալ վայր է: Հայաստանի աշխարհագրական դիրքը կատարյալ բազա կդառնա Կենտրոնական, Հարավային եւ Արեւելյան Եվրոպայում ընկերությունների ու կառավարությունների հետ բիզնես վարելու համար: Մենք ցանկանում ենք հայկական գրասենյակից աշխատել զարգացող շուկաների հետ, քանի որ ՏՏ ենթակառուցվածքների աճը կարող է ավելի արագ լինել, եւ մեր տեխնոլոգիաները կարող են առանցքային նշանակություն ունենալ, երբ Արեւելյան Եվրոպայում տեղի է ունենում տեղեկատվական տեխնոլոգիաների հեղափոխություն:
Հայաստանի կառավարությունը հայտարարում է, որ ՏՏ ընկերություններին գրավիչ պայմաններ է առաջարկում: Դուք ուրիշ երկրներում աշխատելու մեծ փորձ ունեք, եւ հրաշալի տեղյակ եք այնտեղ աշխատելու պայմաններին: Հայաստանում գրասենյակ բացելու Ձեր որոշումը պայմանավորվա՞ծ է այն հանգամանքով, որ Հայաստանում ՏՏ ընկերություններն արտոնություններ ունեն:
Մեզ նախապես հայտնի չէր գրավիչ միջավայրի մասին, որը ՏՏ ընկերություններին առաջարկում է Հայաստանի կառավարությունը, սակայն դա, անկասկած, մայրցամաքային Եվրոպայում մեր աշխատանքի համար Հայաստանին ձեռնտու վայր է դարձնում երկար տարիների ընթացքում:
Ո՞րն է հայկական գրասենյակի գլխավոր խնդիրը: Գրասենյակում արդյոք կաշխատե՞ն հայ ՏՏ մասնագետներ: Եթե՝ այո, քանի՞ աշխատատեղ եք ծրագրում Երեւանում ստեղծել:
Մեր առանցքային եվրոպական ներդրողներից մեկը հայն է, եւ նա կղեկավարի նոր գրասենյակի գործողությունները: Մենք հույս ունենք ոչ պակաս 25 մասնագետի ներգրավել, որպեսզի կենտրոնանանք բիզնեսի զարգացման վրա մեր տեխնոլոգիաները հարկման եւ նույնականացման ոլորտում կիրառելու համար՝ այդ ընթացքում մշակելով այդ տեխնոլոգիայի նոր կիրառումներ:
Օնլայն գործարքները Հայաստանում բավարար զարգացած չեն: Օրինակ՝ Հայաստանում չի գործում PayPal վճարման համակարգը: Սա ինչ-որ կերպ կխանգարի՞ Հայաստանում Ձեր գործունեությանը:
Չնայած մեր տեխնոլոգիան կարող է օգտագործվել օնլայն գործարքների համար, այն նաեւ կարելի է օգտագործել ինքնավար ռեժիմում: VCode-ը կարելի է տարբեր կերպ օգտագործել: Օրինակ՝ VCode-ը ստացել է Եվրահանձնաժողովի հավանությունը լոգիստիկայում օնլայն եւ օֆլայն հետեւելու համար եւ գերազանցում է այս ոլորտում ցանկացած նման տեխնոլոգիաներին: Այս շուկայում ինտերնետի եւ բջջային սարքերի ընդգրկման աճի արագության շնորհիվ մենք կատարելապես համապատասխանում ենք այժմ անվտանգ օֆլայն եւ օնլայն գործարքների ապահովման համար, իսկ մոտ ապագայում բացառապես օնլայն գործարքների համար:
