Ադրբեջանի հետեւողական քաղաքականության նպատակը ոչ միայն սահմանին լարվածությունը պահպանելն է, այլեւ ԵԱՀԿ Մինսկի խմբի հեղինակազրկումը։ Այս մասին սեպտեմբերի 2-ին լրագրողների հետ զրույցում ասաց Ազգային ժողովի արտաքին հարաբերությունների մշտական հանձնաժողովի նախագահ, ՀՀԿ փոխնախագահ Արմեն Աշոտյանը։
Խոսելով ԵԱՀԿ առաքելության դիտարկման ժամանակ ադրբեջանական կողմից հնչած կրակոցների մասին՝ Արմեն Աշոտյանը վստահություն հայտնեց, որ կրակոցներն ուղղված էին ԵԱՀԿ Մինսկի խմբի հեղինակազրկմանը։
«Այդ սադրանքն այլ բացատրություն չի կարող ունենալ։ Այն ԵԱՀԿ Մինսկի խմբին հեղինակազրկելու հերթական փորձն է»,- ընդգծեց Արմեն Աշոտյանը։ Ըստ նրա՝ բանակցային գործընթացը փակուղի է մտել։
«Համանախագահները համաձայնեցրել են առաջարկությունների փաթեթը, որի հետ կապված ադրբեջանական ղեկավարությունը համաձայնություն չի տալիս։ Ադրբեջանի իշխանությունները տարիներ շարունակ երկակի մոտեցումներ են կիրառել։ Եվ Ադրբեջանը բանակցությունների ձեւաչափը փոխելու մեծ ջանքեր է գործադրում»,- ամփոփեց պատգամավորը։
Ավելի վաղ NEWS.am-ը հայտնել էր, որ օգոստոսի 31-ին ԵԱՀԿ Մինսկի խմբի առաքելության դիտարկման ժամանակ ադրբեջանական կողմը խախտել է հրադադարի ռեժիմը։ ԵԱՀԿ գործող նախագահի անձնական ներկայացուցիչ Անջեյ Կասպրշիկի խոսքով՝ մինչեւ դիտարկումը սկսելը Չինարի գյուղ ժամանած խմբի անդամները կրակոցներ են լսել։ Հայկական իշխանությունների համաձայն՝ Ադրբեջանի զինուժը մի քանի կրակոց է արձակել։