Գերմանիայի կառավարության ներկայացուցիչն արձանագրել է, որ «այժմ Թուրքիան այն վիճակում չէ, որպեսզի ԵՄ-ին անդամակցի»...
Թուրքիայի՝ Եվրամիությանն անդամակցելու բանակցությունները դադարեցնելու հարցը կարող է ներառվել հոկտեմբերին նախատեսված միության գագաթնաժողովում։ Այս մասին Բեռլինում ճեպազրույցի ժամանակ հայտարարել է Գերմանիայի կառավարության ներկայացուցիչ Շտեֆան Զայբերթը։
«Եթե հոկտեմբերին Եվրախորհրդի նիստ գումարվի, որը կզբաղվի այդ թեմայով (Թուրքիայի հետ հարաբերությունների), ապա կանցլերը, ինչպես հայտարարել է նախօրեին, գործընկերների հետ կքննարկի, թե պետք է արդյոք բանակցությունները դադարեցնել»,-ասել է նա։
Նրա խոսքով՝ հոկտեմբերին ԵՄ-ի գագաթնաժողով է նախատեսված, որի ժամանակ մասնակիցները կցանկանային Թուրքիայի հետ հարաբերությունների շուրջ կարծիքներ փոխանակել։ «Այժմ բանակցությունները փաստացի սառեցված են, կքննարկվի հարցը, թե արդյոք արժե՞ հաջորդ քայլը ձեռնարկել»,-հավելել է նա։
Գերմանիայի կառավարության ներկայացուցիչն արձանագրել է, որ այժմ Թուրքիան այն վիճակում չէ, որպեսզի ԵՄ-ին անդամակցի։