Դեկտեմբերի 7-ին, ժամը 23.30-ի սահմաններում անհայտ ավտոմեքենայի վարորդը Գեւորգ Չաուշի փողոցում, Երեւան-Աշտարակ ավտոճանապարհի սկզբնամասում` Հայաստանի Կարմիր խաչ հիվանդանոցի մոտ, վրաերթի է ենթարկել 60-70 տարեկան մի տղամարդու, ով տեղում մահացել է:
Ինչպես դեպքի վայրից NEWS.am-ին հայտնեց ֆոտոլրագրող Գագիկ Շամշյանը, վրաերթից հետո վարորդը դիմել է փախուստի: Հարվածն այնքան ուժգին է եղել, որ վրաերթից մահացածին պատկանող հագուստի կտորները հայտնաբերվել են 60-70 մետր հեռավորության վրա:
Դեպքի վայր են ժամանել Երեւանի ճանապարհային ոստիկանության աշխատակիցները, որոնց աշխատանքները ղեկավարում է Երեւանի ՃՈ պետ Արսեն Արշակյանը: Վերջինս իր աշխատակիցներին հանձնարարեց ներքին կապով տեղեկացնել Աշտարակի իր գործընկերների, որ վնասված ավտոմեքենա հայտնաբերելու դեպքում ստուգեն վարորդի ինքնությունը:
Դեպքի վայր ժամանեցին նաեւ Երեւանի ոստիկանության Մաշտոցի բաժնի աշխատակիցները` բաժնի պետի օպեր գծով տեղակալ Հովհաննիսյանի գլխավորությամբ: Նրանք փորձում են ճշտել վրաերթի հետեւանքով մահացածի ինքնությունը:
ՀՀ ոստիկանության քննչական գլխավոր վարչության Երեւանի քննչական վարչության ճանապարհա-տրանսպորտային հանցագործությունների քննության բաժնի քննիչը այս պահին իրականացնում է տեղազննության աշխատանքներ: Քննիչի հանձնարարականով վթարի վայր ժամանած դիահերձարանի աշխատակիցները մահացածի դիակը տեղափոխեցին դիահերձարան:
Լուսանկարները եւ տեսանյութը` Գագիկ Շամշյանի