Թուրքիայի քրդական «Ժողովուրդների դեմոկրատական» (HDP) կուսակցության հայ պատգամավոր Կարո Փայլանը իր 4 կուսակիցների հետ բողոքի նստացույց է սկսել Թուրքիայի սահմանադրական դատարանի շենքում: Այս մասին նա գրել է Twitter-իր իր էջում:
«Մեր պատգամավորները Սահմանադրական դատարանի շենքում սկսեցին խղճի եւ արդարության պատվո պահակությունը»,-գրել է նա:
Նշենք, որ Փայլանն ու իր կուսակիցները պահանջում են ազատ արձակել իրենց բանտարկված կուսակիցներին, այդ թվում կուսակցության համանախագահներ Սելահաթթին Դեմիրթաշին ու Ֆիգեն Յուքսեքդաղին:
Ավելի վաղ NEWS.am-ը հայտնել էր, որ Թուրքիայի քրդական «Ժողովուրդների դեմոկրատական» (HDP) կուսակցության համանախագահներ Սելահաթին Դեմիրթաշի ու Ֆիգեն Յուքսեքդաղի նկատմամբ մեղադրական զեկույցներն ընդունվել են դատարանի կողմից։
Թուրքական Sozcu պարբերականի փոխանցմամբ՝ Դիարբեքիրի դատախազությունը Սելահաթին Դեմիրթաշի դեմ ներկայացրած 500 էջանոց մեղադրական զեկույցում պահանջում է 142 տարվա ազատազրկում, իսկ կին համանախագահ Ֆիգեն Յուքսեդաղի համար՝ 83 տարվա։
Քուրդ գործիչները մեղադրվում են «ահաբեկչական կառույց ստեղծելու ու ղեկավարելու», «ահաբեկչական կառույցի օգտին քարոզչություն անելու», «հանցագործին փառաբանելու», «ժողովրդին ատելության ու թշնամության հրահրելու» մեջ։
