Եվրոպայի խորհրդում Հայաստանի մշտական ներկայացուցիչ Պարույր Հովհաննիսյանը մեկնաբանել է ԵԽ Նախարարների կոմիտեի ընդունած որոշումը, որով Կոմիտեն ընդունել է Հայաստան-Եվրոպայի խորհուրդ 2015-2018թթ․ գործողությունների ծրագրի առաջընթացը: Որոշումը հիմնված է ԵԽ քարտուղարության կողմից պատրաստված համանուն զեկույցի վրա:
Հայաստանի ԱԳՆ-ից NEWS.am-ին հայտնում են, որ Պարույր Հովհաննիսյանը իր խոսքում նշել է.
«Հայաստան-ԵԽ 2015-2018թթ․գործողությունների ծրագրի առաջընթացի մասին զեկույցը ներկայացնելիս Եվրոպայի խորհրդի քարտուղարությունը քանիցս շեշտեց ծրագրի իրականացման ընթացքում Հայաստանի կառուցողական գործելաոճը, որի արդյունքում գրանցվել են գոհացուցիչ արդյունքներ, օրինակ՝ Վենետիկի հանձնաժողովի հետ սերտ գործակցությամբ սահմանադրական բարեփոխումներ, դատաիրավական համակարգում պրոբացիոն ծառայության ներդնում, օմբուդսմենի ինստիտուտի ամրապնդում, մի շարք ոլորտներ կարգավորող օրենսդրական ակտերի վերանայում:
Մի շարք պետությունների պատվիրակներ իրենց խոսքում ՀՀ արձանագրած առաջընթացը համարեցին օրինակելի` խրախուսելով շարունակել ԵԽ շրջանակներում համագործակցությունը` շարունակական առաջընթաց ապահովելու նպատակով: Նշվեց նաեւ Երեւանում ԵԽ գրասենյակի գործունեության կարեւորությունը` հատկապես նկատի ունենալով ԵԱՀԿ երեւանյան գրասենյակի փակման հանգամանքը:
Ցանկանում եմ ընդգծել բոլոր դոնորների` Եվրոպական միության, Շվեդիայի, Դանիայի, Ներվեգիայի, Շվեյցարիայի, Միացյալ Թագավորության, Ֆրանսիայի կարեւոր ներդրումը, քանի որ, ըստ էության, այն էական դրական տեղաշարժերը, որ առկա են առաջին հերթին օրենսդրական բարեփոխումների ոլորտում, իրականացվում են Եվրոպայի խորհրդի փորձագիտական եւ ֆինանսական աջակցությամբ:
Զեկույցի քննարկմանը իմ գործընկերների հնչեցրած ելույթներին ի պատասխան` կարեւորեցինք նրանց քաջալերող խոսքերը եւ վերահաստատեցինք գործողությունների ծրագիրը բարեհաջող ավարտին հասցնելու Հայաստանի վճռականությունը:
Ցանկանում եմ նաեւ շեշտել, որ Եվրոպայի խորհուրդը Հայաստանի անդամակցությունից ի վեր կանգնած է եղել մեր կողքին` աջակցելու մեր պետությունում ժողովրդավարական կառույցների կայացմանը եւ ամրապնդմանը: Հայաստանը հանդիսանում է ԵԽ ակտիվ եւ նախաձեռնող անդամ՝ հավատարիմ իր պարտավորություններին: Ի վերջո, այն բարեփոխումները, որ Հայաստանն է նախաձեռնել եւ հետեւողականորեն գնում է դրանց իրականացմանը, եւս մեկ վկայություն են, որ այդ գործընթացն անշրջելի է:
Նշենք, որ սեպտեմբերի 6-ին Եվրոպայի խորհրդի ղեկավար մարմինը՝ Նախարարների կոմիտեն, ընդունեց Հայաստան-Եվրոպայի խորհուրդ 2015-2018թթ․ գործողությունների ծրագրի առաջընթացի վերաբերյալ որոշում, որը հիմնված է ԵԽ քարտուղարության կողմից պատրաստված համանուն զեկույցի վրա:
Հայաստան-Եվրոպայի խորհուրդ 2015-2018թթ․ գործողությունների ծրագրի պաշտոնական մեկնարկը տրվել է 2016թ. մայիսի 21-ին Երեւանում՝ ՀՀ արտաքին գործերի նախարար Էդվարդ Նալբանդյանի եւ Եվրոպայի խորհրդի գլխավոր քարտուղարի տեղակալ Գաբրիելա Բատտաինի-Դրագոնիի կողմից։
Հայաստան-ԵԽ 2015-2018թթ․գործողությունների ծրագրի առաջընթացի զեկույցում դրական է գնահատվում դրանում ամրագրված՝ մարդու իրավունքների պաշտպանության, իրավունքի գերակայության, ժողովրդավարական կառավարման ուղղություններով արձանագրված արդյունքները։
