Եթե նույնիսկ Իրաքյան Քուրդիստանն անկախանա, այն Թուրքիայից կախված կլինի։ Այս մասին սեպտեմբերի 8-ին՝ լրագրողների հետ հանդիպման ժամանակ, հայտարարեց ՀՀ ԳԱԱ Արեւելագիտության ինստիտուտի տնօրեն, թուրքագետ Ռուբեն Սաֆրաստյանը՝ մեկնաբանելով սեպտեմբերի 25-ին կայանալիք Իրաքյան Քուրդիստանի անկախության մասին հանրաքվեն։
Նրա խոսքով՝ սահմաններով, որոնք ենթադրվում են հիմա, ապագա պետությունը դեպի ծով ելք չի ունենա։ Եթե այժմ այն դրա համար Իրաքն է օգտագործում, ապա, հնարավոր է, հետո նրան դրա համար Թուրքիան պետք լինի։ Բացի այդ, Քուրդիստանի անկախության հանրաքվեն ԱՄՆ միանշանակ աջակցությունը չի վայելում։ ԱՄՆ-ն արդեն Էրբիլի իշխանություններին խնդրել է հանրաքվեն հաջորդ գարուն տեղափոխել՝ պատճառաբանելով «Իսլամական պետության» հետ չլուծված հարցերը։
«Այդ պատճառով հանրաքվեն Քուրդիստանի անկախության ճանապարհին հերթական քայլն է, բայց ոչ վերջնականը»,-նկատեց Սաֆրաստյանը։
Գիտնականի կարծիքով՝ Հայաստանի եւ հայերի հետ կապված՝ Քուրդիստանից վտանգ սպասել պետք չէ։
«Առաջին, դրա սահմանները մեզանից մի քանի կիլոմետր հեռավորությամբ են գտնվում։ Երկրորդ, հայկական համայնքի հետ հարաբերություններն այնտեղ լավ են, եւ հայերենն այնտեղ նույնիսկ պատրաստվում են աշխատանքային լեզուներից մեկը հայտարարել», - հիշեցրեց Ռուբեն Սաֆրաստյանը։
