Նախկին կնոջը, աներոջն ու զոքանչին կացնահարելու գործով դատական նիստին այսօր՝ սեպտեմբերի 12-ին, ցուցմունք տվեց գործով ամբաստանյալ Վլադիկ Մարտիրոսյանը:
Երեւանի Շենգավիթ վարչական շրջանի ընդհանուր իրավասության դատարանում Վլադիկ Մարտիրոսյանը պատմեց, որ ամուսնացել է 2014թ. ձմռանը, ամուսնալուծվել՝ մեկ տարի անց, եւ մինչեւ այսօր չի կարողանում տեսակցել որդու հետ:
«Եղավ այն, ինչ եղավ, երբեք չեմ մտածել՝ Մանսուրյանների հետ վիճաբանություն ստեղծեմ, գնամ, կռվեմ: Վիճաբանության ժամանակ է եղել, ինքս էլ չեմ հասկացել՝ ոնց ա եղել, սպանելու դիտավորություն չեմ ունեցել, զղջում եմ կատարվածի համար, չպիտի նման բան լիներ: Կարող ա՝ վեճ լինի, բան լինի, ըտենց ստացվի, բայց որ ես նստեմ, ծրագրեմ, անհնար ա»,- ասաց նա:
Վլադիկ Մարտիրոսյանը պատմեց, որ դեպքի օրն ինքը խլել է կացինը զոքանչի ձեռքից: Դատավոր Դավիթ Բալայանը հետաքրքրվեց՝ դա նույն այն կացի՞նն է, որը իր պատմելով, օգտագործել է միս կտրատելու համար: Ամբաստանյալը հրաժարվեց այդ հարցին պատասխանել: Բալայանի դիտարկմանը, թե եթե ընդամենը կացինն է խլել, ինչպես է երեք անձ կացնահարվել, Վլադիկ Մարտիրոսյանը կրկին չպատասխանեց: Նշենք, որ Մարտիրոսյանը հրաժարվեց առհասարակ պատասխանել տուժող կողմի հարցերին:
Ամբաստանյալի հարցաքննությունն անցավ բավականին լարված մթնոլորտում: Դատավորը ստիպված էր դատական սանկցիա կիրառել տուժող Վաչագան Մանսուրյանի նկատմամբ եւ հեռացնել նիստերի դահլիճից երկու ժամով: Նշենք, որ Վաչագան Մանսուրյանն անընդհատ ռեպլիկներ էր թողնում նախկին փեսայի հասցեին:
Դատական նիստն այսօր հետաձգվեց եւ նշանակվեց նոյեմբերի 1-ին:
Նշենք, որ նիստն այսօր կրկին ընթանում էր Շենգավիթ վարչական շրջանի ընդհանուր իրավասության դատարանի ապակեպատ դահլիճում եւ ամբաստանյալի ցուցմունքից միայն պատառիկներ էր հնարավոր լսել: Հետաքրքիր է, որ բազմիցս նույնիսկ Դավիթ Բալայանը հորդորեց ամբաստանյալին բարձր խոսել, քանի որ ինքն էլ չէր լսում: Թե այդ պարագայում ինչպես պետք է լսեին ապակիներից այս կողմ գտնվողները, ոչ ոքի կարծես չի էլ մտահոգում:
Ըստ մեղադրական եզրակացության՝ Վլադիկ Մարտիրոսյանը 2016թ. հուլիսի 8-ին իր մանկահասակ երեխային տեսակցելու հարցի շուրջ հերթական անգամ նախկին կնոջ եւ նրա ծնողների հետ վիճաբանելուց հետո վերցրել է կացինն ու գնացել նրանց տուն: Նույն օրը գիշերը Մարտիրոսյանը կացնահարել է նախկին կնոջը՝ Թագուհի Մանսուրյանին, զոքանչին՝ Կարինե Մանսուրյանին: Վերջինս ստացած մարմնական վնասվածքներից մահացել է:
Այնուհետև նույն կացնով Մարտիրոսյանը կացնահարել է նախկին կնոջ հորը՝ պատճառելով ծանր մարմնական վնասվածքներ:
31-ամյա տղամարդուն մեղադրանք է առաջադրվել Քրեական օրենսգրքի 34-104-րդ հոդվածի 2-րդ մասի 1-ին կետով, 104-րդ եւ 137-րդ հոդվածների 1-ին մասերով: Նա կալանավորված է: