ԱՄՆ Ֆլորիդա նահանգում մոլեգնած «Իրմա» փոթորկի պատճառով հայ համայնքը բարեբախտաբար նյութական մեծ կորուստներ չի կրել: Այս մասին NEWS.am-ին ասաց նահանգի հայկական Սուրբ Դավիթ եկեղեցու հոգեւոր հովիվ Տեր Փառեն քահանա Գալստյանը:
«Թեթեւ վնասներ է կրել հայ համայնքը. մեկի տունն է մասնակի վնասվել, մյուսի խանութը կամ ավտոմեքենան: Այնպիսի վնասներ չեն, ինչպես որ Հյուսթոնում եղավ: Մարդիկ էլ կամաց-կամաց վերադառնում են Ֆլորիդա»,- ասաց հայ համայնքի ներկայացուցիչը:
Հայկական եկեղեցին նույնպես վնասներ չի կրել: Տեր Փառեն քահանա Գալստյանի խոսքով, եկեղեցին չի հոսանքազրկվել եւ այդ օրերին էլեկտրականությունից զրկված մարդիկ հնարավորություն են ունեցել օգտվելու եկեղեցու խոհանոցից:
«Մենք հայտարարել էինք, որ կարող են հանգիստ գալ եւ օգտվել խոհանոցից: Ներկայումս նահանգում էլեկտրականության վերականգնման աշխատանքները շարունակվում են»,- նշեց նա:
Նշենք, որ Ատլանտյան օվկիանոսում երբեւէ գրանցված ամենահզոր «Իրմա» փոթորկի հետեւանքով, ըստ ՄԱԿ-ի, հնարավոր է, որ 37 մլն մարդ տուժի: «Իրմա» փոթորիկը, որի հզորությունը հասել է առավելագույն 5 բալի, կարիբյան տարածաշրջանում ամայացման հետք է թողել: Ֆլորիդա փոթորիկը հասել էր սեպտեմբերի 10-ին: «Իրմա»-ի հետեւանքով նախնական տվյալով կա 12 զոհ:
