Ապրիլի 24-ին՝ Հայոց ցեղասպանության օրը, աբխազահայերը հիշում են նաեւ մահաջիրներին՝ դժբախտության եղբայրներին: Այս մասին սեպտեմբերի 16-ին Երեւանում լրագրողներին ասաց Աբխազիայի հայ համայնքի ներկայացուցիչ Սուրեն Կերսելյանը:
Ապրիլի 24-ին հայ համայնքը հավաքվում է Գագրայի Փրկչի եկեղեցում, որը վերջին տարիներին է կառուցվել: Մեծ Եղեռնի անմեղ զոհերին հիշելուց հետո հայերը դեպի ծով են ուղեւորվում եւ ջուրն են իջեցնում ծաղկեպսակներ՝ խորհրդանշականորեն դրանք ծովով ուղարկելով աբխազների վշտի ճանապարհի հետքով, որոնք հայրենիքից զրկվել են:
«Այս կերպ մենք հարգում ենք մահաջիրների հիշատակը, որոնք հարկադրված էին հայրենի հողը լքել եւ ուղեւորվել Օսմանյան Թուրքիայում զրկանքների ճանապարհով: Նրանք, ինչպես եւ հայերը, զրկվել են հայրենիքից, իսկ ոմանք՝ նաեւ կյանքից: Եվ այդ օրը մենք պետք է մեր գլուխը խոնարհենք նրանց ճակատագրի առջեւ»,- նշեց Կերսելյանը:
Հայրենադարձ մահաջիրների հանդեպ հայերի վերաբերմունքն այնպիսին է, ինչպես Աբխազիայի մյուս բոլոր բնակիչների հանդեպ, ընդգծեց նա:
«Անցած խորհրդարանական արշավներից մեկի ժամանակ ինձ հետ առաջադրվել էր հայրենադարձ աբխազ, որն ինձ անցավ: Սակայն երբ ես քարոզում էի մեր շրջանի հայերի առջեւ, մտքովս էլ չէր անցնում շահարկել «թուրքական գործոնը»: Ես հայերին ասում էի՝ բարեկամներ, նա Աբխազիայի նույնպիսի քաղաքացի է, ինչպես եւ մենք: Այդպես էլ կա: Նրանք մասնակցում են մեր տոներին եւ միջոցառումներին, մենք՝ նրանց: Եվ սա պատահականություն չէ: Մեր 2 ժողովուրդների եղբայրությունը երեկ չի ծնվել, եւ մենք այնքան իմաստնություն ունենք, որ այն չտապալենք»,- նշեց Կերսելյանը:
