ՄԱԿ Անվտանգության խորհուրդը սեպտեմբերի 21-ին նիստ կանցկացնի՝ նվիրված Հյուսիսային Կորեայի հրթիռամիջուկային ծրագրին: Վկայակոչելով դիվանագիտական շրջանակներում աղբյուրին՝ այս մասին հայտնել է AFP-ն: Գործակալության տեղեկություններով՝ անդամ երկրները կներկայացվեն արտաքին քաղաքականության գերատեսչությունների ղեկավարների մակարդակով:
Նշվում է, որ հանդիպման նախաձեռնողը ԱՄՆ-ն է: Դիվանագետները Նյու Յորքում կհավաքվեն ՄԱԿ Գլխավոր վեհաժողովի 72-րդ նստաշրջանին մասնակցելու համար:
Հինգշաբթի Անվտանգության խորհուրդը արտահերթ խորհրդակցություն է անցկացրել՝ կապված Հյուսիսային Կորեայի հերթական հրթիռային փորձարկման հետ, որն իրականացվել է 2375 բանաձեւն ընդունելուց 4 օր հետո, որով նախատեսվում էր Փհենյանի դեմ պատժամիջոցների խստացում:
Բանավեճի արդյունքներով հայտարարություն է ընդունվել, որով դատապարտվել են Հյուսիսային Կորեայի ղեկավարության սադրիչ գործողությունները, ինչպես նաեւ նշվել է երկրի նկատմամբ գործող սահմանափակումներին ամբողջովին հետեւելու անհրաժեշտության մասին:
