Հայաստանի կառավարությունը զրո տոկոս հանդուրժողություն է հայտարարել կոռուպցիայի նկատմամբ: Այս մասին սեպտեմբերի 19-ին ասաց վարչապետ Կարեն Կարապետյանը՝ ելույթ ունենալով Երեւանում ընթացող Հայաստան-Սփյուռք համաժողովում:
Նրա խոսքով՝ իշխանություններն աշխատում են պետական պաշտոնյայի կերպարի վրա, որը պետք է աշխատի հանուն քաղաքացիների շահերի՝ ձեռնարկատերերի, թոշակառուների, զինվորականների, հասարակության բոլոր շերտերի: Եթե խոսելու լինենք առանձին ոլորտներում ծրագրերի մասին, ապա արմատական փոփոխություններ են պատրաստվում կրթության ոլորտում, որտեղ կներդրվեն նոր տեխնոլոգիաներ եւ նոր ծրագրեր: Նպատակը դպրոցների շրջանավարտներին, ապագա մասնագետներին ժամանակակից գիտելիքների կրող դարձնելն է: «Գյուղատնտեսության ոլորտում գյուղացիներին արտոնյալ վարկեր են առաջարկվել, որոնք ցանկանում են ժամանակակից տեխնոլոգիաներ ներդնել: Արդյունաբերության ոլորտում արտահանողներին առաջարկվել է բազմաճյուղ աջակցություն»,- հավելեց Կարապետյանը: