Ադրբեջանի Ներքին գործերի նախարարությունում մեկնաբանել են նույնասեռականների զանգվածային կալանավորումների պատճառները: «Ադրբեջանում սեռական փոքրամասնությունները երբեք չեն հետապնդվել: Բայց դա չի նշանակում, որ այդ կատեգորիայի քաղաքացիներն ազատվում են անօրինական գործողությունների պատճառով պատասխանատվությունից: Վերջին ժամանակներս ոչ ավանդական սեռական կողմնորոշում ունեցող մարդիկ կանոնավոր մարմնավաճառությամբ են զբաղվում՝ երեկոյան ժամերին հավաքվելով քաղաքի կենտրոնի որոշակի տեղերում: Նրանց պահվածքը խախտում է հասարակական կարգը:
Քաղաքի բնակիչները բազմիցս դիմել են ոստիկանությանը՝ պահանջելով դադարեցնել այդ մարդկանց անօրինական վարքագիծը, և մենք ստիպված էինք քայլեր ձեռնարկել: Այնպես որ գործողությունները սկսվել են այն մարդկանց նկատմամբ, ովքեր վաստակում էին մարմնավաճառությամբ, այլ ոչ թե միանշանակ նույնասեռական փոքրամասնությունների դեմ: Ի դեպ, պարզվել էր, որ «փողոցում աշխատողներից» շատերը վեներական հիվանդությունների և ՄԻԱՎ-ի կրողներ են»,- haqqin.az-ին հայտնել են ՆԳՆ մամուլի ծառայությունից՝ ի պատասխան Ադրբեջանում նույնասեռականների իրավունքների ոտնահարման բողոքների: