ՆԱՏՕ-ն աջակցում է այն բոլոր ջանքերին, որոնք ուղղված են Հյուսիսային Կորեայի միջուկային սպառազինության եւ մեծ հեռահարության հրթիռների զարգացման դադարեցմանը: AP գործակալության հետ զրույցում այս մասին ասել է Նյու Յորք ժամանած ՆԱՏՕ-ի գլխավոր քարտուղար Յենս Ստոլտենբերգը, որտեղ ընթանում է ՄԱԿ Գլխավոր ասամբլեայի 72-րդ նստաշրջանը, փոխանցում է ՏԱՍՍ-ը:
«Մենք դատապարտում ենք միջուկային սպառազինության եւ մեծ հեռահարության հրթիռների կատարելագործումը»,- նշել է նա՝ հավելելով. «Մենք համագործակցում ենք տարածաշրջանում մեր գործընկերների՝ Ճապոնիայի եւ Հարավային Կորեայի հետ: Իհարկե, մենք հստակ աջակցում ենք ցանկացած ջանքերի՝ ուղղված այն բանին, որ Հյուսիսային Կորեան դադարի այդպիսի սպառազինություն ստեղծել»:
Նա հաստատել է հոկտեմբերին Հարավային Կորեա եւ Ճապոնիա այցելելու ծրագրերը՝ Հյուսիսային Կորեայի հրթիռամիջուկային խնդիրները քննարկելու համար: