Իրաքյան Քուրդիստանը մինչեւ հիմա պատրաստ է անկախության հանրաքվեն հետաձգել ինքնավարությանը որոշակի երաշխիքներ տրամադրելու դեպքում: Այս մասին «ՌԻԱ Նովոստի»-ին ասել է Իրաքյան Քուրդիստանի նախագահի լրատվամիջոցների հարցերով խորհրդական Քիֆահ Սանջարին:
Սանջարիի խոսքով՝ «վերջին մի քանի ժամերին շրջանի ղեկավար Մասուդ Բարզանին կրկին մի շարք երաշխիքների տրամադրման առաջարկով է հանդես եկել՝ ուղղված նրանց, ովքեր հանրաքվեի հետաձգում են պահանջում»:
«Եթե այդ երաշխիքները, որոնք հաշվի կառնեն Քուրդիստանի իրական դիրքը, տրամադրվեն, ապա մենք հանրաքվեի անցկացման ժամկետը կտեղափոխենք եւ սեպտեմբերի 25-ին կնշենք այդ երաշխիքներին հասնելու տոնը»,- հայտարարել է Սանջարին:
Նրա խոսքով՝ այս պահին որոշումը կախված է Իրաքի վարչապետ Հայդեր ալ Աբադիից, ԱՄՆ վարչակազմից եւ ՄԱԿ-ից:
«Պահանջվող երաշխիքներն են՝ ամենամոտ ժամանակում հանրաքվեի անցկացման այլ ժամկետի համաձայնություն, դրա արդյունքների հանդեպ հարգանք: Իրաքյան կողմի հետ սահմանների ապալիմիտացման մասին բանակցությունների մեկնարկ, ջրային պաշարների հարցի քննարկում, ինչպես նաեւ բանակցություններ վիճելի տարածքների շուրջ, որոնց թվում են Քիրքուքը, Սինջարը եւ այլ հողեր»,- ասել է Սինջարին:
Իրաքյան Քուրդիստանի իշխանությունները Իրաքից անկախանալու հանրաքվեի անցկացումը նշանակել են սեպտեմբերի 25-ին՝ արհամարհելով կենտրոնական իշխանությունների կարծիքը: Բաղդադում հանրաքվեն ապօրինի են համարում, որի անցկացման դեմ է քվեարկել խորհրդարանը: