Միացյալ Նահանգները հարված չի հասցնի Հյուսիսային Կորեային, քանի որ վստահ է, որ Փհենյանը միջուկային զենք ունի, որը կարող է որպես պատասխան օգտագործվել: Այս մասին հայտարարել է ՌԴ ԱԳ նախարար Սերգեյ Լավրովը, փոխանցում է ՏԱՍՍ-ը:
«Հյուսիսային Կորեային ամերիկացիները հարված չեն հասցնի, որովհետեւ նրանք ոչ թե կասկածում են, այլ ճշգրիտ գիտեն, որ նրանք միջուկային ռումբեր ունեն: Իսկ ՌԴ նախագահ Վլադիմիր Պուտինը այս հարցին անդրադառնալիս մի քանի անգամ ասել է, թե անհնար է պատկերացնել, որ ամերիկացիները կամ որեւէ այլ մեկը 100-տոկոսանոց տեղեկություններ ունեն անխտիր բոլոր օբյեկտների մասին»,- ասել է նա:
«Ես հիմա Հյուսիսային Կորեային չեմ պաշտպանում, այլ պարզապես ասում եմ այն, ինչպիսի վերլուծության հետ գործնականում բոլորը համաձայն են»,- հավելել է ՌԴ ԱԳ նախարարը:
Նախարարի խոսքով՝ այս տրամաբանության հետ համաձայն է ՄԱԿ Գլխավոր ասամբլեայի շրջանակում բարձր մակարդակով իր զրուցակիցների մեծ մասը: Նա նշել է, որ սրա հիմքում Իրաք ամերիկացիների ներխուժման փորձն է ընկած: «Ամերիկացիները Իրաքի վրա հարված հասցրին բացառապես այն պատճառով, որ 100-տոկոսանոց տեղեկություն ունեին, որ զանգվածային ոչնչացման ոչ մի զենք չի մնացել»,- ասել է Լավրովը:
Լավրովը հույս է հայտնել, որ իր ներկայացրած տրամաբանությունը հաշվի կառնվի Վաշինգտոնի վերլուծաբանների կողմից: Հակառակ դեպքում իրավիճաը կարող է խզվել «շատ անկանխատեսելի բարձրակետում, եւ կտուժեն հազարավոր, տասնյակ, եթե ոչ հարյուր հազարավոր անմեղ մարդիկ նույն Հարավային Կորեայում, Հյուսիսային Կորեայում, իհարկե՝ Ճապոնիայում, դե Ռուսաստանն ու Չինաստանն էլ շատ մոտ են»,- նշել է Լավրովը:
