Հայուհի Բլանկա Սիմոնյանը իսկական փրկիչ է Թենեսի նահանգի Նոքս շրջանի ոչ անգլախոս բնակիչների համար:
87-ամյա Բլանկան աշխատում է տեղի առողջապահության դեպարտամենտում: Բլանկան մեծացել է Ուրուգվայում եւ իսպաներենը նրա մայրենի լեզուն է: Դեռ վաղ հասակից նա անգլերեն է սովորել եւ ազատ խոսում է երկու լեզուներով:
Բլանկայի ծնողները Հայոց ցեղասպանության ժամանակ սկզբում տեղափոխվել են Լիբանան, այնուհետեւ Ուրուգվայ եւ վերջիվերջո հաստատվել ԱՄՆ-ում, հաղորդում է knoxnews.com- ը: «Ես երբեմն կարծում եմ, գուցե ես այստեղ եմ, որովհետեւ իմ ծնողները անընդհատ պատմել են, թե կյանքում ինչքան անօգնական եւ հուսահատ պահեր են ունեցել: Երբ տեսնում եմ, որ ինչ-որ մեկը հուսահատ է, ուզում եմ ուրախացնել նրան», - ասել է Բլանկան:
Սիմոնյանը 60-ականների սկզբին ստացել է ԱՄՆ վիզա եւ հաստատվել Չիկագոյում, որտեղ բժշկասոցիալական աշխատանք է սովորել, սակայն կուբացիների մեծ ներհոսքի պատճառով, աշխատանքի է անցել կրթական համակարգում:
Նա օգնել է իսպանալեզու ուսանողներին սովորելու անգլերեն եւ մաթեմատիկա:
Թեեւ Բլանկան արդեն 87 տարեկան է, սակայն չի պատրաստվում թոշակի անցնել: «Ո՞վ է ստեղծել այդ բառը: Եթե ես տանը մնամ, ես չեմ կարողանա խոսել եւ շփվել նման լավ մարդկանց հետ», - ասել է նա: