Բոլոր հակամարտությունների լուծումները հանգում են ոչ թե դրանց նմանություններին, այլ տարբերություններին: Սեպտեմբերի 27-ին լրագրողների հետ հանդիպման ժամանակ այսպիսի կարծիք հայտնեց «Ընդդեմ իրավական կամայականության» հասարակական կազմակերպության գործադիր տնօրեն, նախկին ՄԻՊ Լարիսա Աավերդյանը՝ մեկնաբանելով սեպտեմբերի 25-ին անցկացված Իրաքի Քուրդիստանի անկախության հանրաքվեն եւ ընդհանրապես տարածաշրջանի իրավիճակը:
Նրա խոսքով՝ այս կամ այն հակամարտությունը կարգավորելու համար անհրաժեշտ է հաշվի առնել առանձին դրանցից յուրաքանչյուրի առանձնահատկությունները: «Օրինակ՝ քուրդ ժողովուրդն աշխարհում ամենամեծ էթնոսն է, որը մինչ օրս պետականություն չունի»,- նշեց Ալավերդյանը՝ ընդգծելով, որ Իրաքի իշխանությունները եւ Իրաքի Քուրդիստանին հարեւան երկրները պետք է աջակցեն քուրդ ժողովրդին եւ նրա կամքին հարգանքով վերաբերվեն:
Խոսելով քրդերի ղեկավարության դիրքորոշման մասին՝ Ալավերդյանը բարձր գնահատեց նրա մոտեցումը, որոնք պատրաստ են զիջումների գնալ, նստել բանակցությունների սեղանի շուրջ եւ իրենց անկախությունը չեն հռչակում: Ըստ նրա՝ նման մոտեցումը խելամիտ է եւ պրագմատիկ:
Լարիսա Ալավերդյանը շեշտեց, որ իրավական տեսակետից Իրաքի Քուրդիստանի հանրաքվեն համապատասխանում է միջազգային բոլոր նորմերին: Այլ հարց է, որ քաղաքական տեսակետից այս հարցին չափազանց զգույշ եւ զգալի անվստահությամբ են վերաբերվում: