Լաս Վեգասի կենտրոնում գտնվող հյուրանոցային համարում, որտեղից տեղի էր ունեցել հրաձգությունը, հայտնաբերվել է առնվազն 8 միավոր հրազեն, հայտնում են ոստիկանությունից:
Տղամարդը մարդկանց վրա է կրակել՝ գտնվելով Mandalay Bay հյուրանոցի 32-րդ հարկում, որը փողոցով էր բաժանվում հարթակից, որտեղ ընթանում էր փառատոնը: Հրաձգությունն անչափ ինտենսիվ էր, տղամարդը մի քանի րոպե գրեթե անընդհատ կրակել է: Մի քանի ականատեսներ պատմում են, որ նա 30 կամ 40 փամփշտակալ է կրակել, այսինքն՝ մոտ հազար փամփուշտ: Այլ ականատեսներ ավելի համեստ տվյալներ են բերում՝ պնդելով, որ կրակոցները հարյուրից պակաս չէին:
Հրաձգությունը փառատոնի մասնակիցների շրջանում խուճապ է առաջացրել, ծեծկռտուք է սկսվել: Ականատեսները պատմնել են, որ նույնիսկ վիրավորված մարդիկ շարունակել են փախչել՝ կրակոցներից փրկվելով: Դեպքի վայրից փախածները ցնցման մեջ փողոցներով շրջել են արյունոտված հագուստով:
Ոստիկանության տվյալներով՝ հարձակման հետեւանքով առնվազն 50 մարդ է մահացել: Տեղական հիվանդանոցի ներկայացուցիչը եւս 14-ի վիճակը ծայրահեղ ծանր է գնահատում: Լաս Վեգասի ոստիկանությունում հայտնել են, որ զոհվածների թվում են իրավակարգի 2 աշխատակից, որոնք ծառայության մեջ չէին:
Կասկածյալը գնդակահարվել է, երբ հատուկ նշանակության ջոկատայինները գրոհով գրավել են համարը, որտեղից հրաձգությունը կատարվել էր: Վերջին տվյալներով՝ հրաձիգը 64-ամյա տղամարդ է՝ Սթիվեն Փեդոք անունով, որը նախկինում ոչ մի անգամ չի հայտնվել իրավապահների տեսադաշտում: Ո՛չ ոստիկանությունը, ո՛չ ՀԴԲ-ն տեղեկություններ չունեն ահաբեկչական ճանաչված կազմակերպությունների հետ նրա կապերի վերաբերյալ: Կատարվածի դրդապատճառները դեռեւս չեն պարզվել:
Հիմա ոստիկանությունը փնտրում է Մերիլ Դանլի անունով կնոջը, որի հետ կասկածյալին տեսել են հրաձգությունից կարճ ժամանակ առաջ: Հետախուզվում է 2 ավտոմեքենա Chrysler Pacifica եւ Hyundai Tucson, որոնցով նա, ենթադրաբար, կարող էր փախուստի դիմել: Տեղի շերիֆը հայտնել է, որ Դանլիի գտնվելու վայրն արդեն պարզվել է:
Լաս Վեգասի հրաձգությունը դարձել է ԱՄՆ-ում հրազենի կիրառմամբ խոշորագույն զանգվածային սպանությունը: Մինչեւ հիմա նմանօրինակ ամենախոշոր միջադեպ էր համարվում Օռլանդոյի (Ֆլորիդա նահանգ) Pulse գեյ ակումբում հրաձգությունը, որը տեղի է ունեցել 2016 թվականի հունիսին: Այդ ժամանակ ծայրահեղականներին հավատարմության երդում տված Օմար Մարտինը սպանել էր 49 մարդու, փոխանցում է BBC-ի ռուսական ծառայությունը:
