Հայաստանի եւ եւս 3 երկրների տարածքներում «Մարտական եղբայրություն-2017» զորավարժությունները կանցկացվեն Հավաքական անվտանգության պայմանագրի կազմակերպության (ՀԱՊԿ) շրջանակում: Այս մասին հոկտեմբերի 4-ին լրագրողների հետ հանդիպման ժամանակ ասաց պաշտպանության նախկին նախարար Վաղարշակ Հարությունյանը:
Նրա խոսքով՝ երկրները, որոնց տարածքներում զորավարժությունները կանցկացվեն, նույնպես ՀԱՊԿ անդամ են: «Հայաստանից բացի, այդ երկրներն են՝ Ռուսաստանը, Ղազախստանը եւ Տաջիկստանը: Կմասնակցեն նաեւ ՀԱՊԿ անդամ բոլոր երկրները՝ Հայաստանը, Բելառուսը, Ռուսաստանը, Տաջիկստանը, Ղրղզստանը եւ Ղազախստանը»,- պարզաբանեց նա՝ հավելելով, որ համատեղ զորավարժություններին ընդհանուր 12 հազար մարդ կմասնակցի, 1500 միավոր զրահատեխնիկա եւ ավելի քան 50 թռչող սարք:
Ըստ պաշտպանոթյան նախկին նախարարի՝ զորավարժությունների նպատակը ՀԱՊԿ կառավարման համակարգի բարելավումն է: Հարությունյանը նշեց, որ ՀԱՊԿ համատեղ զորավարժությունները մի քանի փուլով են անցկացվելու: Առաջին փուլը կանցկացվի Հայաստանում: Դրան կմասնակցեն բանակային հետախուզության հատուկ ստորաբաժանումները, ՀԱՊԿ Արագ արձագանքման հավաքական ուժերը, ինչպես նաեւ առաջին անգամ՝ Ռուսաստանի եւ Հայաստանի զորքերի Միացյալ խմբավորման ստորաբաժանումը:
Վաղարշակ Հարությունյանը հայտնեց, որ Հայաստանի տարածքում «Մարտական եղբայրություն-2017» զորավարժությունների անցկացման համար կնեգրավվեն Ալագյազ եւ Բաղրամյան զորավարժարանները: