ԱՄՆ-ն պատրաստվում է Սուդանի նկատմամբ տնտեսական պատժամիջոցները չեղյալ համարել: Ըստ Միացյալ Նահանգների՝ երկրում մարդու իրավունքների բարելավում եւ ահաբեկչության դեմ պայքարի առաջընթաց է նկատվում: Այս մասին տեղեկացնում է Reuters-ը՝ վկայակոչելով ԱՄՆ պաշտոնական ներկայացուցիչին:
Ակնկալվում է, որ նախագահ Դոնալդ Թրամփի վարչակազմը ուրբաթ օրը իր որոշման մասին կհայտարարի:
Պատժամիջոցների չեղարկումը, որին դեմ են որոշ իրավապաշտպաններ, կվերացնի առեւտրի էմբարգոն, կդադարեցնի ակտիվների սառեցումը եւ կվերացնի ֆինանսական խոչընդոտները:
Ներկայումս Սուդանը Իրանի եւ Սիրիայի հետ միասին շարունակում է մնալ ԱՄՆ ահաբեկչության պետական հովանավորների ցանկում: