Թարմ մսի գների բարձրացումը կապված է անասնագլխաքանակի անկման ու արտահանման աճի հետ: Այս մասին, այսօր՝ հոկտեմբերի 12-ին, Հանրային խորհրդում կայացած քննարկման ժամանակ նշել է ՀՀ գյուղատնտեսության փոխնախարար Աշոտ Հարությունյանը:
Նրա խոսքով, թանկացման խնդրի հիմնական պատճառը խոտի արտադրության ծավալների նվազումն է՝ կապված երկարատեւ ու ծանր ձմեռվա հետ, ինչի հետեւանքով անասնակերը թանկացել է, լրացուցիչ ծախսերն ավելացել են, գյուղացին սկսել է միսն ավելի թանկ վաճառել վերավաճառողին եւ այլն: Բացի դա, եղել է անասնագլխի քանակի անկում: Մսի գների բարձրացման պատճառներից մեկն էլ, ըստ փոխնախարարի, մանր եւ խոշոր եղջերավոր անասունների արտահանման ծավալների կտրուկ ավելացումն է: Փոխնախարարը նշել է, որ հայկական տեղական միսը որակապես բավականին բարձր է, այդ պատճառով էլ արտահանման ծավալները աճում են:
Քննարկելով մի խումբ ապրանքների գների բարձրացման օբյեկտիվ եւ սուբյեկտիվ պատճառները՝ Հանրային խորհրդի անդամները գտել են, որ ՀՀ կառավարությունը ոչ միայն պետք է վերահսկի եւ վերլուծի իրավիճակն ու միտումները, գտնի շուկայական ճկուն մեխանիզմներ ազդելու գների կարգավորման վրա, մշակի համապատասխան նոր ռազմավարություններ եւ ուղղորդված քաղաքականություն գյուղատնտեսության եւ տեղական արտադրության զարգացման ուղղությամբ, քայլեր ձեռնարկի պետություն-մասնավոր հատված համագործակցության ընդլայնման ուղղությամբ՝ նպաստելով տեղական շուկայում առաջին անհրաժեշտության ապրանքների արտադրության ծավալների ավելացմանը, այլ նաեւ համապատասխան միջոցներ պետք է ձեռք առնի, որպեսզի հնարավոր թանկացումները բնակչության հատկապես խոցելի խավի համար զգալի չլինեն եւ ինչ որ կերպ փոխհատուցվեն:
