Ղարաբաղի Թալիշ գյուղի գյուղացիները կոոպերատիվ են բացել։ Անցնելով ավելի քան 300 կմ՝ նրանք Երեւան են բերել մուրաբաներ, կոմպոտ եւ բոլորին հայտնի թթի օղի։
Ընկերությունը կոչվում է «Թարինջ»՝ Թարթառ եւ Ինջա գետերի անուններով։ Տարաները գյուղացիներին տվել է ղարաբաղյան «Բալասանյան» ընկերությունը։
«Երեւանում շատ են խոսում Թալիշի մասին։ Նրանց լսես՝ այնտեղ ոչ ոք չի ապրում, եւ ապրելու տեղ էլ չկա։ Բայց այդպես չէ։ Ապրում էլ են, աշխատում էլ են»,- ասել է «Բալասանյան» ընկերության տնօրեն Արթուր Բալասանյանը, ով Երեւանում ArmProdexpo 2017-ի ժամանակ ներկայացրել է ընկերության արտադրանքը։
Մամխի մուրաբան, մորու կոմպոտն ու մեկուկես տասնյակ այլ մթերքներ դեռեւս չեն համտեսել ոչ միայն Երեւանում, այլ նաեւ Ստեփանակերտում։ Այնտեղ մեկ անգամ այս ամենը ցուցադրվել էր, իսկ Երեւան առաջին անգամ են բերում։