Էլ-կառավարման գործիքների մշակումը արդարադատության ոլորտում, չնայած ոչ մեծ ֆինանսավորմանը՝ մոտավորապես 2 մլն եվրո, լավ օրինակ է հասարակ քաղաքացիների պահանջների բավարարման համատեքստում։ Այդ մասին այսօր՝ հոկտեմբերի 17-ին, «Էլ-կառավարման գործիքների մշակում արդարադատության ոլորտում» ծրագրի ներկայացման ժամանակ նշեց ԵՄ պատվիրակության ղեկավար Պյոտր Սվիտալսկին։
Նրա խոսքով, այսպիսով, հասարակ քաղաքացիները հնարավորություն կունենան տեսնելու եւ զգալու ԵՄ-ՀՀ համագործակցության արդյունքը։
Խոսելով e-apostile.am համակարգի մասին՝ Սվիտալսկին նշեց, որ այս հարթակի հիմնական հասցեատերը կլինեն արտասահմանում ապրող կամ գործարարությամբ զբաղվող քաղաքացիները։ Իսկ e-draft.am համակարգը կլինի նորարական տարբերակ քաղաքացինների օրինաստեղծ ոլորտում ուղղակի ներգրավածության, իրենց ձայնը լսելի դարձնելու համար՝ առանց քաղաքական կուսակցությունների կամ կազմակերպությունների միջնորդության։
ԵՄ պատվիրակության ղեկավարը իր ելույթի վերջում գոհունակություն հայտնեց, որ ծրագրի շնորհիվ Հայաստանում ներդրվում է աշխարհի լավագույն փորձն ու ժամանակակից կառավարումը, որի արդյունքում Հայաստանն առաջատար է դառնում մյուս երկրների՝ անգամ Եվրամիության երկրների նկատմամբ: Իսկ կոռուպցիոն եւ բյուրոկրատական ռիսկերի նվազեցման ուղղությամբ այս հարթակները շատ կարեւոր են։